English Premier League din a nih tirh atangin nasa takin a thang zel a, 2013-14 season-a Premier League chhiah tling khawm chu £2.4 billion lai niin Ernst & Young (EY) chuan a tarlang.

£2.4 billion atanga hmun thuma thena hmun khat, £891m te chu player te chhiah tling khawm a ni a, EY-in a tarlan dan chuan Premier League chhiah tling khawm £2.4bn hian Police constable 93,000 chuang hlawh a pe thei var var, England leh Wales-a police constable 90% vel a chawm thei tihna a nih chu.

Premier League club leh player ten chhiah an pek hi a tam khawp mai a, UK economy thannaah nasa takin a pui, £3.4bn lai Premier League club leh player te hian UK ram hmasawn nan sum an thawh a ni. Premier League hian eizawnna tam tak a siam a, mipui 103,354 chuang zet chu Premier League chhiahin a chawm leh Premier League kaihhnawiha eizawnna nei niin an chhut a ni.

EY Chief Economist Mark Gregory chuan Premier League hian football hmasawnna mai bakah ram hmasawnna turin sum tam tak UK tan a thawh a ni tih a sawi nghe nghe.