Naktuka Aizawl FC hmachhawn tur Shillong Lajong FC coach Thangboi Singto chuan RG Stadium-ah point thum hmuh ngei an tum tih a sawi a, Aizawl FC coach Khalid Jamil pawhin inkhel hautak a ni dawn tih a sawi.
Season liamta I-League-a an in hmachhawnna game hnihah khan Lajong hian sulhnu an nei țha zawk a, an inkhel hmasaah 0-0 in an inhnehtawk a Shillong-ah Aizawl FC hi 3-1 in an hneh.
Tun season-ah Aizawl FC hian game hnih an khelh tawh ațangin point li an hlawhchhuak thei a Lajong hian game hnih bawk khel tawhin point an la nei ve lo thung.
Aizawl Press Club-ah thuthar lakhawmtute nen an inkawmnaah Lajong coach Thangboi chuan, "Aizawl FC coach hian tawnhriat a ngah tawh a coach țha tak pawh a ni. Inkhel tin hi a pawimawh a, keini tan bik pheichuan a pawimawh lehzual. Khualmualah a zawnin vawithum kan khel dawn ta a, hei hi a hautak hle."
"AFC competiton khel zo hlim deuh chauh Bengaluru FC kan hmachhawn a Mohun Bagan pawh kha an țha hle. Khalid hi hmachhawn a hautak țhin a, khelmualah kan lo in hmachhawn ve nual tawh."
"Naktuk hi an tan a hautak mah zawkin ka ring. A chhan chu keini chuan chak kan tum ve dawn chauh a ni a, an ni hi chuan point hmuh belh an duh ang."
"Coach tinte hian point khat ai chuan point thum hmuh kan duh vekin ka hria a, Aizawl FC pawhin a hma ai chuan an khelhțhat ka ring a inkhel hautak a ni ngei ang. Keini pawhin point thum hmuh ngei kan mamawh." tiin a sawi.
Kum 2013 ațanga Lajong enkawl tawh Thangboi hian Mizoram-a an inkhelh dawn vangin Mizo player a neihte khelhtir a tum bik lo tih a sawi tel a, khelh phu chiah a chhawr dawn tih a sawilang bawk.
Aizawl FC coach Khalid Jamil pawhin Thangboi a fak a, Lajong hi team țha an ni tih a sawi.
Mumbai FC coach hlui Khalid chuan, "Lajong hi khelh an harsa dawn a, Thangboi hi hmachhawn a awlsam ngai lo. Rilru leh taksa in fit țhat kan mamawh a, Lajong hian an game hmasa ber an khel țha lo va an game hnihnaah erawh an țha tawh hle."
"Player an nei țha a inkhel awlsam tak a ni lo ang. Player pawh kan inthlak nual dawn a, player pathum emaw pali vel chu kan inthlak kual ang." tiin a sawi a, hliam vanga season bulțan thei lo Chullova a chhawr dawn nge chhawr dawn lo tih a sawichiang lo thung.
Aizawl FC vs Shillong Lajong FC
A hun: 17th January (1:30pm)
A hmun: Rajiv Gandhi Stadium, Mualpui
Live-na tur: Ten 2