Juventus midfielder Paul Pogba chuan mi tam takin khawvela footballer piang tawha tha ber pahnih anga an sawi Pele leh Maradona aia tha nih a duh thu a sawi.
Pele leh Maradona-te thatzia leh ropuizia sawi nawn a ngai lo. Tunlai footballer tha rawn chhuak thar apiang New Pele leh New Maradona emaw Pele thlaktu tur Maradona thlaktu tur kan tih zelna pawh hian an ropuina sawi chiang tawk hle a ni.
Manchester United a chhuahsan hnua khawvela midfielder tha ber pawla inhlangkai thei Pogba chuan hemi chungchang hi sawiin, "Pele leh Maradona anga Legend nih ve hi ka duh a ni. Anih loh pawhin an aia ropui nih ka duh. Ka tha ta ber e ka tihna a ni lo a, anmahni anga ropui nih ka duh thu ka sawi mai a ni." tiin Pele leh Maradona anga ropui emaw an aia ropui nih a duh thu a sawi.
Kum 23 a upa Pogba hian sawizawmin, " Buaina ka nei a, chu chu chak loh ka thiam lo hi a ni. Danglam bik nih ka duh a, midangin anla tih ngai loh tih hi ka duh thin. Ka thawkrim em em a, tha famkim nih ka duh bawk. Kan chak hian ka hlim thin hle. Player ngainat hlawh ber ka ni lo maithei, nih tum pawh a ni lem lo. Khawvela tha ber nih hi ka tum a ni." tiin midang ngaihdanin a tihbuai lem loh thu a sawi.
Pogba hian Juventus a pan hnuah Seria A title tum li a chawi tawh a, Coppa Italia nomawi tum khat a chawi tawh bawk. France player pawimawh hian Pele Leh Maradona aia tha nih a tum chuan France-in Euro an thlen hunah an ram hi a champion pui a ngai ngei ang le.