Sum lama an tlakchhiat avangin Serie D-ah paihthlak an ni, chumi hnuah Parma chuan kum thum ngawt a zawnin promotion an hlawhchhuak a, Italian top flight football-ah an rawn inhlangkai leh ta. 1990s-a Europe club lian niin Uefa Cup leh Coppa Italia vawi hnih an chawi, kum 2015 khan sum lamah an tlachhia, an player te hlawh pawh an pe thei lo, Serie D (4th Division)-ah paihthlak an ni ta a.
Kum 2015-a Serie D-a paihthlak an nih tum khan hun harsa tak tawng mahse an supporter-te an zam lo, division hniam takah awm mahse season hmasa zawka Serie A an khelh lai aia tam daih fans ten season tickets an lei hem mai, chu chu an club tan zia lantirna leh an tanpuina a ni bawk.
Parma supporter te chu heti hian an zairual thin, "Hnehna tam tak kan chan hnuah 4th Division-ah kan chhukthla, hetih lai hian Parma team an inkhelh tawh phawt chuan kan tel zel ang. Kawng chu a thui dawn hle tih chu kan hria, kan tuar bawk ang. Mahse keini hi kan intelkhawm tlat chuan Serie A-ah kan kir leh ngei ang," tiin. Kum 2016 khan Serie C-ah an kaichho a, kum 2017 khan Serie B-ah an kaichho leh. Kar hmasa khan season match hnuhnung berah ropui takin Serie A-ah an kaichho leh, a zawnin kum thum chhungin promotion vawi thum ngawt an hlawhchhuak ta a ni.
Serie A-a Parma hruai kirtu captain ropui Alessandro Lucarelli chu kum 40 mi a ni tawh, Serie D-a an tlakthlak laia an captain kha niin; ani hian nasa takin Parma supporter-te a fuih tang a. "Kan chungah eng pawh thleng se, Fans hnenah Parma-a ka cham chhunzawm zel tur thu ka puang. Chutih laiin ka tan chuan kha thutlukna kha siam a harsa lo hle thung, a chhan chu Parma tana khelh hi ka duh ber a ni tlat si a. Serie D-a kei ka khelh kha fans te tan chona a ni ve bawk tih ka hria a, kan supporter-te an fakawmin an ropui tak zet a ni," tiin a sawi.
Kum 10 liamta khan Lucarelli hian Parma a zawm a, he Parma zinkawng ngaihnawm takah hian mi pawimawh tak a ni chiang kher mai. Hetiang khawpa club-in chhiatna a tawh hnua an rawn thawhleh dan chanchin hi Italian football-ah chuan kan la hre ngai lo, football chanchinah pawh thawnthu ngaihnawm tak a ni chiang e.
Fitness hi a pawimawh tak zet, chutih laiin team inlungrualna leh huaisenna hi engkim hnehna chu a lo ni tih Parma chanchin atang hian kan hre thei awm e. Parma hi team ropui ni thin an ni a, player ropui tak tak an lo nei tawh thin. Parma-a khel thin Roberto Mussi, Faustino Asprilla, Dino Baggio, Antonio Benarrivo, Tomas Brolin, Gianluigi Buffon, Fabio Cannavaro, Enrico Chiesa, Hernan Crespo, Lorenzo Minotti, Roberto Nestor Sensini, Hristo Stoichkov, Lilian Thuram, Juan Sebastian Veron leh Gianfranco Zola te hi khawvelah pawh player tha ber ber an ni vek. Heng zawng zawng zinga Parma fans tena an ngaih ropui ni ta chu club-in hun harsa tak a tawh lai pawha phatsan duh lotu captain Alessandro Lucarelli hi a ni.