Paris khaw vawta insiamrem harsat Messi

05th December 2021, 03:12PM

Lionel Messi chuan November thla tawp khan a vawi 7 nan Ballon d'Or hlan a ni a, Ballon d'Or dawn tam kawnga amah hnaih bertu chu Cristiano Ronaldo niin, Ronaldo hian vawi 5 a dawng tawh.

A hun pum Barcelona tan a khel dawn emaw tih laiin Lionel Messi chuan a vawi khat nan kumin nipui bazar inhawn chhung khan France club PSG a zawm a, PSG hian player super star rual nei mah se an khel erawh a la ropui tak tak thei lo, Lionel Messi pawhin Barcelona-a a khelh angin a khel thei bik hauh lo mai.

Messi hian tun season Ligue 1-ah game 9 (minute 685) khel tawhin goal 1 a khung tawh a, assist vawi 3 nei tawhin chance vawi 10 a siam. Shots hi vawi 23 a nei tawh a, goal zawnah vawi 10 a pet tawh. Tin, Shots accuracy hi 43.48% nei tawhin ball hloh hi vawi 131 lai a nei tawh bawk a ni. Ballon d'Or a dawn hnuah PSG tan vawi hnih league-ah inlan tawh mah se a team a chakpui zo lo ve ve.

December ni 1 khan Nice nen an inhmachhawn a, goal awm lovin an inhnehtawk. December ni 4 zanah Lens nen inhmachhawn lehin hetah hian 1-1 in an inhnehtawk a, second half minute 62-naa Fofana goal chu hun tawp dawn tak tak 90+1 min-ah Wijnaldum chuan PSG tan a rul.

League-ah a zawnin chak zo lo ve ve mah se PSG hi anni aia game khata khel tlem zawk Marseille lakah point 13 laiin an la fal tho. 

Ronaldo leh Messi khaikhin an ni reng a, Ronaldo tantute chuan khawi leagueah pawh kal kual mah se, team hran hran zawm mah se Ronaldo chu a insiamrem thei zel a, Messi erawh Barcelona game angah lo chuan a khel tha thei dawn lo, chuvang chuan Barcelona chhuahsan a duh lo an ti thin.

Messi chuan PSG a zawm ve ta a, team tharah a insiamrem thei lo nge? Barcelona a la ngaih em em avangin inkhelh nuam a la ti lo zawk? Tih chu zawhna a ni mek e. 

Barcelona-a a lo khelhpui tawh thin Luis Suarez chuan vawiin thlengin Messi nen an la inbiak reng thu TNT Sport a hrilh a, Messi hian Paris khaw vawt taka inkhelh harsa a tih thu a hrilh niin Suarez chuan a sawi bawk.

Kum 34 mi Messi hian khawiah nge a football career a hman zawh dawn? Hei hi football fan-te hriat chak ber zing ami a ni. PSG-ah hian inkhelh harsa ti hle mah se reilote chhungin a insiamrem vat a rinawm a. 

Coach azir te pawh a ni ve bawk ang a, PSG hian Pochettino hi an ruai reng lo ve maithei bawk a, tuna PSG squad hi a la in balance tawk chiah lo niin football pundit te pawhin an ngai. Team tha tak ni mah se harsatna nei an nih ve tho avangin kan lo beisei sang viau te pawh a ni ve thei bawk a. Season tawpah meuh chuan Messi hian Ballon d'Or vawi 7 lai lak hi a phu a ni kan ti leh nge nge ngei ang le.

Copyright © inkhel.com 2022. All rights reserved.