Mizoram State Mixed Martial Arts Association (MISMA) hma laknain North East level Mixed Martial Arts seminar chu August ni 6-8, 2015-ah neih a ni. He seminar-ah hian north east state panga an tel: Mizoram, Meghalaya, Assam, Nagaland leh Manipur.
Official (referee, judge, time-keeper, marshal & cut-man) leh instructor seminar neih a ni a; seminar atana resource person hi National body (All India Mixed Martial Arts Association – AIMMAA) rawn tirh, Bangalore a awm Mizo tlangval ngei Tv. Samuel Lalrozâma Hmar a ni. Ani hi MISMA technical chairman a ni bawk a, india-in international referee kan neih pahnih awm chhun zinga pakhat a ni a, world championship-a india mi referee hmasa ber a ni bawk. He seminar bakah hian North East body siam nghal a ni a; a hmingah North-East India Mixed Martial Arts Association (NEMA) vuah a ni a, hruaitu thlan tharte chu hengte hi an ni:
Commissioner: Samuel Lalrozama Hmar.
President: Dr. Joel Lalnghakliana Pautu, Mizoram
Senior Vice- President: Biswajit Sarkar, Assam.
Vice- President: Isaiah Kharmawphlang, Meghalaya.
Vice- President: Vire Nukhu, Nagaland.
Secretary: Lalthakima, Mizoram.
Treasurer: Lalchhuanmawia Hnamte, Mizoram.
North East-ah hian MMA hian hma a la sawn tawk lo hle a, sorkar pawm game a nih loh vangin sum lam harsatna a awm nasa a, amaherawhchu, theih tawpa hma lak a, north east mite hi india ram mai baka ram pawn thleng pawha vawrh chhuah an tum a ni. Chumi tan chuan plan hmasa berah state tinah seminar neih rawt nghal a ni a, resource person Samuela chu a kal kual nghal dawn a ni.
He seminar hi JSJ FitPro gym nena tang kawpa huaihawt a ni a, he gym neitu chu NEMA president thar Dr. Joela tho hi a ni. MISMA headquarters gym-ah hman nghal tur a ni a, he seminar chhung hian hawnna pawh neih nghal a ni. Gym-ah hian MMA bakah weight training gym a awm thei dawn a, equipment changkang ber chi chah a ni a, Mizoramah pawh MMA cage hun ngei tum a ni.
Mizoram mai ni lo , North East a trining center tha ber tura duan a ni. MISMA president R. Zosangliana chuan hetiang gym changkang kan neih tak vang hian Mizote hmakhua a en thu a sawi a, hetianga mi thahnemngai thalaite promote nana sum sen huam an rawn ding chhuak hi a lawmawm thu a sawi. National commissioner Daniel Isaac pawhin JSJ FitPro chu duhsakna sang ber a hlan a, Mizoram atang hian India tan thil tha tak a chhuah ngei a rin thu a sawi bawk. Tun kum tawp lam ngei hian JSJ FitPro chuan cable network lian te nen tang kawpin MMA league lian tak kum tluan daih tur, kan thalaiten an talent hmanga sum an hai luhna chance siamsak a tum bawk a ni.