Kumin nipui bazar chu a HOT khawp mai, English Premier League club te an mawm em em a, player pawh an lei deuh pawp pawp, hetih lai hian club hausa PSG pawhin player hrawl tak tak lei tumin hma an la mek.

PSG leh Sanchez te chu mimal thilah an inrem tawh nia report a ni a, hetih lai hian Sanchez hian chhuah duh ringawt mahse Arsenal-ah kum khat contract a la neih avangin a chung thu chu Arsenal hotute kutah a awm. Tin, PSG hian Arsenal hnenah Sanchez hi lei an dil leh phawt dawn a, transfer hi a hlawhtling dawn em? tih sawi lawk a harsa khawp mai.

Beisei loh lamah PSG chuan Brazilian foward Neymar lei an tum thut mai, transfer titi lengvak mai mai a ni lo tih a chiang, Barcelona hotute pawh an buai hle nghe nghe. Paris Saint-Germain hian Neymar-a release clause 222 million euros lai chu pek an huam hem mai, heti a nih chuan Neymar-a duh leh duh lovah a innghat tawh a, Brazil lam media te chuan PSG leh Neymar te hi inrem tawh ang hialin an sawi nghe nghe.

Barcelona chuan Neymar an chan takin tiin Juventus forward Paulo Dybala an ngaihven ve nghal niin Marca chuan a tarlang a, Neymar hian Messi-a hlawh zat hlawh a duh ve nia tarlan a ni bawk a, Barcelona hian chu chu an tihhlawhtlin sak theih loh chuan Neymar hian Paris lam a pan mai a rinawm ta hle.

A hma pawhin Barcelona hian Argentine forward Dybala hi an rim tawh nia sawi a ni a, amah Dybala pawhin Catalan club pan a hnial lo nia report a ni bawk.