Tun dinhmunah Real Madrid forward leh Barcelona striker Messi-ten Ballon d’Or an in dawn chhawk a ni ber a. Anni pahnih khing phak an awm meuh lo.

Pogba chuan ESPN Brazil kaltiangin a mimal ngaihdan a sawi a, Ronaldo leh Messi-te hi an kum a tam ve tan tawh a, he chawimawina dawng chhunzawm zel tur chuan an upa ve deuh tawhah a ngai.

Pogba chuan,”Engtikni-ah emaw chuan a sang pathum zingah ka hming hi a la awm ve ngei ka ring. Ballon d’Or dawn hi mimala ka hmachhawp lian ber pakhat a ni. Chutih rual chuan footballer tha tam tak an awm a, awlsam tak chuan he lawmman hi a lak theih dawn loh.

“He chawimawina dawng leh tur hi tu nge sawi lawk thei awm? Tun dinhmunah Neymar, Hazard leh Reus-te an tha em em a, anni bakah player tha ber ni thei tur pawh tam tak an awm bawk. Messi leh Ronaldo thlak thei tur player naupang zingah Dybala leh Griezman-te pawh hi sawi hmaih chi an ni lo.

“Season tluanin, harsatna leh inhliam lova an khelh tluan theih ka beisei. Eng nge lo thleng dawn tih chu ka sawi lawk thei lo a, mahse heng player ka sawi tak te nen hian Messi leh Ronaldo-te hnung kan la zui vat ang,”a ti.

“Neymar hi tha ka ti ber a, nakkin lawka Ballon d’Or dawng tur chuan ani hi ka ring ber. Football player ve tho ka ni a, mahse Neymar-a inkhel ka en hian nuam ti takin ka thlir thin.

“Amah avang hian football hi nuam ti takin ka khel a, ka en thin. Ball a thiam em em a, a chang hi chuan khelmualah hian a lam ni ber hian ka hre thin. Ball chauh a thiamlo a, scorer a ni bakah a thiante tan goal chance a siam sak bawk thin,”tiin Neymar tha a tih thu Pogba chuan a sawi bawk. Pogba hian football lamah chuan a ngaihdan a dah lian hle a, amah ngei pawh Ballon d’Or dawng thei dinhmuna dingah a inngai a ni.