Aizawl District Football Association (ADFA) leh TT Royte Group buatsaih NECS Cup 2017 Inter Village Football Tournament Round of 16 chu March ni 15, Nilaini khan AR Lammualah khelh chhunzawm leh a ni. inkhel vawi hnih awmin Ramhlun South leh Armed Veng South chuan an khingpui ve ve hnehin NECS Cup 2017 quarter final an lut ve leh ta a ni. Khelh tawhah Thingsulthliah leh Ramhlun North ten quarter final an lut tawh bawk.

March ni 16, Ninganiah khelh chhun zawm leh a ni ang a, chawhma dar 11:00 AM-ah Luangmual leh Chhinga Veng ten an khel ang a, chawhnu dar 1:00 PM-ah Zemabawk North leh Electric Veng ten an khel thung ang. Inkhel hmasa zawk Luangmual tan tute hi K Kawla stand-ah thut tur a ni a, Chhinga Veng tan tute hi Zomuanthanga stand-ah thut tur a ni. Inkhel hnuhnung zawk Zemabawk North tan tute hi K Kawla stand-ah thut tur a ni a, Electric Veng tan tute hi Zomuanthanga stand-ah thut tur a ni.

11:00 AM Venghlui 0-1 Ramhlun South

(R Lalthanmawia 59',)

Vawiin inkhel hmasa zawkah Ramhlun South chuan sikhat faiin Venghlui an hneh a, goal awm chhun hi second half tan a tang a minute 59-ah R Lalthanmawia khung a ni. Ramhlun South hi NECS Cup vawi li buatsaih tawhah vawi hnih an champion tawh a, tun tumah hian champion turin theihna an nei tih an lan tir leh bawk a ni.

01:00 PM Republic Veng 1-2 Armed Veng South

(Rorelliana 22') (Lalnunsanga (Tale-a) 83', Laldawngliana Colney 94')

Inkhel hnuhnungah Republic Veng leh Armed Veng South te hun pangangaiah 1-1 a an inhneh tawk hnuah extra time khelh leh a ni a, Armed Veng South chuan 2-1 in hnehna an chang ta a ni. Armed Veng South tan Lalnunsanga (Tale-a) leh Laldawngliana Colney chuan goal khat ve ve an khung a, Republic Veng tan Rorelliana chuan goal khat a khung ve bawk. Kum 2005-ah CYMA Football Tournament final-ah Republic Veng hian Armed Veng South hi hnehin champion tawh mahse, tun tum NECS Cup-ah erawh Armed Veng South an chungnung zawk a ni.

First half tan a tang a, minute 20-ah Armed Veng South tan Tale-a chuan goal  khung mahse, hand ball vangin goal-ah pawm a ni lo, Republic Veng chuan nawr let nghalin minute 22-ah Rorelliana chuan goal hmahruai a khung a, goal dang luh belh lo in Republic Veng chuan 1-0 a hmahruaiin chawlh lawk an hmang.

Second half hun tawp nan minute 7-a la awmin Armed South tan Lalnunsanga (Tale-a) chuan penalty an hlawh chhuah hmangin an siphurh sutna goal-a khung.  Extra time khelh nghal a ni a, minute 94-ah Armed Veng South tan defender Lalhruaizela ball vawr luh tha zet chu Laldawngliana chuan box-ah la lutin an chakna goal-a khung ta a ni.

March ni 16, Nilaini Fixtures:

11:00 Am Luangmual vs Chhinga Veng

01:00 PM Zemabawk North vs Electric Veng

(adsbygoogle = window.adsbygoogle || []).push({});