Aizawl District Football Association (ADFA) buatsaih NECS Cup quarterfinal chu March ni 14, 2016 khan khelh tan niin, Armed Veng leh Venghluite chuan an khingpui ve ve hnehin semi final an lut a, semi final-ah Armed Veng leh Venghluite hi an inhmachhawn dawn a ni.
March ni 15, Thawhlehniah quarter final hi khelh chhunzawm leh tur a ni a, dar 12:00 PM-ah Vaivakawn leh Ramhlun South ten an khel ang a, chawhnu dar 02:00 PM-ah Chhinga Veng leh Bethlehem Vengthlang ten an khel leh ang.
Armed Veng South 2 - 3 Armed Veng
(Lalnunsanga 62'80') (Lalmuanzova 56' , B.Zoramthanga 74' 90+1')
Inkhel hmasa zawkah Champion lai Armed Veng chuan an veng thenawm Armed veng South chu 3-2 in an hneh. Goal lut te hi second half a lut vek a ni a, Armed Veng tan Lalmuanzova chuan minute 56-ah goal hmahruai khung mahse minute 6 a ral hmain Armed Veng South tan Lalnunsanga chuan an siphur sutna goal a khung ve leh nghal zat bawk.
Armed Veng lam chuan nawr let leh nghalin, B Zoramthara chuan minute 73-ah Armed Veng goal hnihna a thun leh a, 2-1 in Armed Veng chuan hma hruai mahse, an hruai reilo kher mai, minute 4 a ral hmain, Armed Veng South tan Lalnuasanga bawk chuan penalty an hlawh chhuah hmangin an goal hnih na thun vel leh nghal a, 2-2 in an in hneh tawk hnu hun tawp dawn minute 1 a la awmin Armed Veng tan B Zoramthara bawk chuan freekick atangin chakna goal mawi takin a khung leh ta a, Semifinal an lut ta a ni.
Chanmari West 1 - 1 Venghlui
(H.Lalnunzira 64' ) (Isak Vanlalpeka 54')
(Venghlui Win 4 - 3 Penalty)
Inkhel hnuhnung zawkah Chanmari West leh Venghlui te inkhelin hun pangngaiah 1-1 a anin hneh tawk hnuah penalty shootout-in chak zawk zawn a ni a, Venghlui hian 4-3 a hnehna changin semifinal an lut ve leh ta a ni. Goal lut te hi second half a lut ve ve an ni a, Venghlui tan Isak Vanlalpeka chuan goal a khung a, Chanmari West tan H Lalnunzira chuan an siphur sutna goal a khung ve bawk.