Aizawl District Football Association (ADFA) leh TT Royte Group buatsaih NECS Cup 2017 Inter Village Football Tournament Round of 16 chu March ni 16, Ningani khan khelh chhunzawm leh a ni a, inkhelah vawi hnih awmin Chhinga Veng leh Electric Veng chuan an khingpui ve ve hnehin NECS Cup 2017 quarter final an lut ve leh ta a ni. Khelh tawhah Thingsulthliah, Ramhlun North, Ramhlun South leh Armed Veng South ten quarter final an lut tawh bawk.

March ni 17, Zirtawpah khelh chhun zawm leh a ni ang a, Chawhma dar 11:00 AM-ah Chawnpui leh Bawngkawn ten an khel ang a, chawhnu dar 1:00 PM-ah Sihphir Venghlun leh Bethlehem ten an khel thung ang. Inkhel hmasa zawk Chawnpui tan tute hi K Kawla stand-ah thut tur a ni a, Bawngkawn tan tute hi Zomuanthanga stand-ah thut tur a ni. Inkhel hnuhnung zawk Sihphir Venghlun tan tute hi K Kawla stand-ah thut tur a ni a, Bethlehem Veng tan tute hi Zomuanthanga stand-ah thu tur a ni.

11:00 Am Luangmual 1-7 Chhinga Veng

(Lalruatkima 80') (Rochharzela 6', 43', Paul Ramfangzauva 20', Vanlallawma 27', Lalthlamuana 72', Lalsawmzela 75', F Lalnuntluanga 88')

Inkhel hmasa zawkah Chhinga Veng chuan 7-1 in Luangmual an sawp. Chhinga Veng tan Rochharzela'n goal hnih a khung a, Paul Ramfangzauva, Vanlallawma, Lalthlamuana, Lalsawmzela leh F Lalnuntluanga ten goal khat theuh an khung bawk. Luangmual tan Lalruatkima chuan goal khat a khung ve bawk. He inkhelah hian Vanlalawma Chhinga Veng chu Man of the match-ah thlan a ni.

First half-ah goal li lai a lut a, inkhelh tan a tang a, minute 6-ah Chhinga Veng tan Rochharzela chuan goal hmahruai a khung a, minute 20-ah Paul Ramfangzauva chuan an goal hnihna khungin,  minute 7 aral hmain Vanlallawma chuan an goal thumna a khung leh nghal zat bawk.  Hun tawp nan minute 2 ala awmin Lalchuanpuia penalty hlawh chhuah chu Rochharzela chuan pet goal in, an goal li na a khung leh a, Chhinga Veng chuan 4-0 a hmahruaiin chawlh lawk an hmang.

Second half-ah goal goal li bawk lutin minute 72-ah Chhinga Veng tan Lalchuanpuia ball vawr luh tha zet chu box chhunga awm Lalthlamuana chuan pet goal in, an goal nga na a khung a, minute 3 aral leh hmain Lalsawmzela chuan an goal rukna a thun chhun zawm leh nghal zat bawk. Luangmual tan minute 80-ah Lalruatkima chuan an goal khatna khung ve bawk mahse, minute 88-ah Chhinga Veng tan F Lalnuntluanga chuan an goal 7 na a khung leh nghal zat a, goal dang luh belh tawh lo in, Chhinga Veng Chuan 7-1 a hnehna changin quarter final an lut ve ta a ni.

01:00 PM Zemabawk North 0-0 Electric Veng

(Electeic Veng win 5-3 penalty)

Inkhel hnuhnungah Zemabawk North leh Electric Veng te hun pangngaiah goal awmlo a an in hneh tawk hnuah extra time an khel leh a, chutah pawh goal awmlo a in hneh tawk leh in, penalty shootout-a chak zawk zawn a nih hnuah Electric Veng chuan 5-4 in hnehna an chang ta a ni. He inkhelah hian Lalengzauva  Electric Veng chu Man of the match-ah thlan a ni.

Inkhel pumpui thlirin team pahnih te an in hneh tawk a, goal thuna hun tha an bawhpelh nasa hle; Zemabawk North player te naupang deuh mahse, an in rual khat tlang a, team tha tak an nih an lantir a,  tlarhma an hriam tawk lo thung.

Electric Veng player te erawh tlemin puitling zawkin lian zawk mahse, Zemabawk North rawlthar te an duh angin an nawr thei bik lo, goal thunna hun tha nei ve nual bawk mahse, goal an khung thei bik lo. I League club Aizawl FC tan a khel mek Tri-a leh Jojo-a te hun chanve hnu lamah rawn lutin inkhel thunun mahse, Zemabawk North player te huntawp thlengin an tang tluan thei thung a, penalty shootout-ah Zemabawk North an vanduai ta zawk a ni.

March ni 17, Zirtawpni Fixtures:

11:00 AM Chawnpui vs Bawngkawn

01:00 PM Sihphir Venghlun vs Bethlehem

(adsbygoogle = window.adsbygoogle || []).push({});