March ni 18, Inrinni khan NECS Cup 2017 Inter Village Football Tournament Quarter final  khelh tan a ni a, inkhel vawi hnih awmin inkhel hmasa zawk Armed Veng South chuan 1-0 in Ramhlun North an hneh a, inkhel hnuhnungah Thingsulthliah leh Ramhlun South an in hneh tawk thung.

Quarter final atang hian League-a khelh a ni a, Pool A-ah Thingsulthliah, Ramhlun North, Ramhlun South leh Armed Veng an awm a, Pool B-ah Chhinga Veng, Electric Veng, Bawngkawn leh Sihphir Venghlun an awm thung a ni.

March ni 20, Thawhtanni Chawhma dar 11:00 AM-ah Electric Veng leh Sihphir Venghlun ten an khel ang a, chawhnu dar 1:00 PM-ah Chhinga Veng leh Bawngkawnten an khel thung ang. Inkhel hmasa zawk Electrict Veng tan tute hi K.Kawla stand-ah thut tur a ni a, Sihphir Venghlun tan tute hi Zomuanthanga stand-ah thut tur a ni. Inkhel hnuhnung zawk Chhinga Veng tan tute hi K.Kawla stand-ah thut tur a ni a, Bawngkawn tan tute hi Zomuanthanga stand-ah thu tur a ni.

11:00 AM Ramhlun North 0-2 Armed Veng South

(C Ramdinmawia 32', Laldawngliana Colney 86')

Inkhel hmasa zawk Armed Veng South chuan sihnih faiin Ramhlun North an hneh. Armed Veng South tan C Ramdinmawia leh Laldawngliana chuan goal khat ve ve an khung. He inkhelah hian Lalruatpuia Armed Veng South chu Man of the match-ah thlan a ni.

Inkhel tan a ni a, team pahnih te an in nawr tawn zak zak hnuah Armed Veng South chuan an chance neih hmang tangkai hmasa zawkin minute 32-ah midfielder Ramdina chuan an goal hmahruai a khung a, goal dang luh belh lo in Armed Veng South chuan 1-0 a hmahruaiin chawlhlawk an hmang.

Second half-ah Armed Veng South chuan inkhel thunun zawk mahse, goal erawh an thun belh mai thei lo a, Ramhlun North pawhin an siphurh sut tumin counter attack-in nawr ve bawk mahse, goal an khung thei bik lo. Armed Veng South chuan 1-0 in hnehna an chang mai dawn emaw tih hnu hun tawp nan minute 4 ala awmin Lalruatpuia goal shoot tha zet chu Ramhlun North keeper Sangpuia nampial nangchinin Laldawngliana chuan an chak nem ngheh nan a pet goal a, Armed Veng South chuan 2-0 a hnehna changin, point thum hlu tak an hlawh chhuak ta a ni.

01:00 PM Thingsulthliah 2-2 Ramhlun South

(Lalfelpuia 59', KT Vanlalhruaia 82') (Vanlalthlamuana 45', R Lalthanmawia 86')

Inkhel hnuhnung zawk Thingsulthliah leh Ramhlun South te 2-2 in anin hneh tawk. Thingsulthliah tan Lalfelpuia leh KT Vanlalhruaia chuan goal khat ve ve an khung a, Ramhlun South tan Vanlalthlamuana leh Lalthanmawia chuan goal khat ve ve an khung bawk. He inkhelah hian KT Vanlalhruaia Thingsulthliah chu Man of the match-ah thlan a ni.

First half-ah goal awmlo in chawlh lawk an hmang dawn emaw tih hnu hun tawp dawn injury time-ah Ramhlun South tan Thlamuana chuan goal hmahruai a khung a, Ramhlun South chuan 1-0 a hmahruaiin chawlh lawk an hmang. 

Second half tan a tang a, minute 19-ah Thingsulthliah tan Vanlalhruaia penalty hlawh chhuah chu Captain Lalfelpuia chuan petin an siphurh a rul a, minute 82-ah Thingsulthliah tan KT Vanlalhruaia chuan an goal hnihna a khung leh a, minute 4 aral leh hmain Ramhlun South tan Lalchhuanmawia ball vawr luh tha zet chu box chhunga awm R Lalthanmawia chuan tauh goal in an siphurh sutna goal-a khung ve leh a, goal dang luh belh tawh lo in 2-2 in an in hneh tawk ta a ni.

March ni 20, Thawhtanni Quarter Final Fixtures:

11:00 AM Electric Veng ve Sihphir Venghlun

01:00 PM Chhinga Veng vs Bawngkawn

(adsbygoogle = window.adsbygoogle || []).push({});