Aizawl District Football Association (ADFA) leh TT Royte Group buatsaih NECS Cup 2017 Inter Village Football Tournament khelh mek chuan a vawr tawp a thleng chho mek a, semifinal match hmasa zawkah Bawngkawn chuan Ramhlun South hnehin final an lut tawh a, semifinal match hnuhnung zawk hi March ni 28, Thawhlehni chawhnu dar 2:00 PM khan khelh leh a ni a, Chhinga Veng leh Thingsulthliah te chu hun pangngaiah 1-1 in anin hneh tawk a, extra time-ah pawh goal dang a luh belh lo.

(adsbygoogle = window.adsbygoogle || []).push({});

Penalty shootout-in chak zawk zawn a ni leh a, Chhinga Veng chuan 4-2 a hnehna changin final an lut ve ta a ni. He inkhelah hian Lalfelpuia Thingsulthliah chu Man of the match-ah thlan a ni.

Final hi March ni 30, Ningani chawhnu dar 2:00 PM-ah Bawngkawn leh Chhinga Veng ten an khel ang. Bawngkawn tan tu te hi K. Kawla stand-ah thut tur a ni ang a, Chhinga Veng tan tu te hi Zomuanthanga stand-ah thut tur a ni thung ang.

Chhinga Veng 1-1 Thingsulthliah

(Vanlallawma 74') (Isak Vanlalruatfela 22') 

(Penalty shootout-ah 4-2 in Chhinga Veng an chak)

Inkhel tan a ni a, team pahnih te an innawr tawn zak zak a, Chhinga Veng tan Vanlallawma chuan goal thunna hun tha a hloh, Thingsulthliah chuan an chance neih an hmang tangkai thung. Minute 22-ah defender Lalbiakzuala freekick pet  chu box chhunga awm winger Isak Vanlalruatfela chuan pet goal-in Thingsualthliah chuan si khat faiin hma an hruai. Chhinga Veng chuan an siphurh sut tumin an nawr let a, captain Rochharzela shot tha zet chu Thingsulthliah goalkeeper Laldailova chuan a lo dan sak thung. Goal dang luh belh lovin Thingsulthliah chuan 1-0 a hmahruaiin chawlh lawk an hmang ta a ni.

Second half-ah Chhinga Veng chuan inkhel thunun zawk mahse Rachharzela, Lalthlamuana leh Vanlallawma ten Thingsulthliah tlarhnung an pal tlang thei lo. Chhinga Veng tan Isaac Lalremruata leh Christo luh tir an ni a, an goal nawr a na sawt. Minute 74-ah Vanlallawma chuan an siphurh sutna goal a khung ta a ni.

Thingsulthliah chuan hnehna chan ngei tumin an nawr let, KT Vanlalhruaia, Isak Vanlalruata leh Joel Lalmuanpuia ten goal thun belhna hun tha an hloh.  Goal luh belh tawh loin hun pangngaiah 1-1 in an inhneh tawk.  Extra time khelh a ni a, chutah pawh goal-a luh belh lo.  Penalty shootout-in chak zawk zawn a ni a, Chhinga Veng tan a pet tu ten an pet goal vek a, Thingsulthliah lamah Lalfelpuia leh Malsawmzuala ten an pet goal lo thung a, Chhinga Veng chuan 4-2 in hnehna an chang ta a ni.

March ni 30, Ningani Final Fixture: 

02:00 PM Bawngkawn vs Chhinga Veng

(adsbygoogle = window.adsbygoogle || []).push({});