March ni 30, Ningani chawhnu dar 2 khan Aizawl District Football Association (ADFA) leh TT Royte Group buatsaih NECS Cup 2017 Inter Village Football Tournament final chu Bawngkawn leh Chhinga Veng ten an khel a, Chhinga Veng chuan si khat fai a Bawngkawn hnehin NECS Cup 2017 champion nomawi an chawi ta a ni.
NECS Cup hi vawi li khelh tawh a ni a, Ramhlun South vawi hnih an champion tawh a, Armed Veng leh Bethlehem Vengthlang vawi khat ve ve an champion tawh a, Chhinga Veng hi champion thar an ni ta a ni.
Bawngkawn leh Chhinga Veng te hi quarter final-a an match hmasa berah inhmachhawn tawhin, Chhinga Veng hian 7-0 in an sawp a, final-ah inhmachhawn lehin; Chhinga Veng chuan 1-0 in hnehna an chang leh ta a ni.
Bawngkawn 0-1 Chhinga Veng
(Vanlallawma 64')
Bawngkawn XI:MC Lalneihsanga, Lalruatkima, Lalzidinga, Ramdinthara, Rothangpuia, Lalnuntluanga, Immanuel malsawmthara, Lalthakima, Lalmuankima, Lalrwmruata, MS Dawngliana.
Chhinga Veng XI: Sangtluanga, Christopher Lalhruaitluanga, Vanlalthanga, Lalnunmawia, Paul Ramfangzauva, Isaak Lalrwmruata, Lalsawmzela, Rochharzela, Lalthlamuana, Vamlallawma, K Lalthlahlova.
Final-a goal awmchhun hi Vanlallawma khung niin,man of the match-a thlan a ni chhunzawm bawk a. Tin, Vanlallawma hian goal 15 lai a khung a, top scorer a ni nghe nghe, Rs 5000/- leh Tropy a dawng a ni.
Final match-ah hian team hnihte an intumtawk hle a, inkhelh tan atanga reiloteah Bawngkawn chuan chance an nei a, captain Tluanga freekick chu box chhunga awm forward Dawngtea chuan a tauh goal, mahse offside vangin goal-ah pawm a ni lo.
Chhinga Veng tan Rochharzela, Sawmzela leh K Lalthlahlovate chuan goal thunna hun tha an hloh a, Bawngkawn tan Mka, Lalremruata leh Dawngtea te chu khel tha hle mahse clear chance an nei hlei thei bik lo. Half time a nih chuan goal awm lovin an inhnehtawk a.
Second half-ah Chhinga Veng chuan inkhel thunun zawkin, K Lalthlahlova leh Sawmzela ten goal thuna hun tha an bawhpelh. Bawngkawn tan Lalthakima leh Mka te chu tal na hle mahse Chhinga Veng tlarhnung an paltlang hleithei bik lo.
65 mins-ah winger Rochharzela ball cross tha zet chu Vanlallawma chuan chiang zet a pet goal ta, Chhinga Veng chuan si khat faiin hma an hruai.
Goal a luh hnu lawkah player-te an buai deuh laih laih, Bawngkawn midfielder Aruata hnawh chhuah a ni a, Bawngkawn chu kim lo zawk ni mahse an buai em em lo, counter attack hmangin an nawr thut thut, Chhinga Veng an buai teuh thin hle.
Top Scorer : Vanlallawma (Chhinga Veng)
Huntawp dawn minute 4 a la awmin Bawngkawn midfieder Lalthakima leh Dawngtea te chuan goal khungna hun tha nei mahse an pet tha zet chu Chhinga Veng goalkeeper Sangtluanga chuan a lo dan sak a, Chhinga Veng chuan a tawp thlengin an goal an humhim, si khat faiin hnehna an chang ta a ni.
Best Player : Rochharzela (Chhinga Veng)
Champion team Chhinga Veng hian Rs 2,00,000/- leh Trophy an dawng a, Pahnihna Bawngkawn chuan Rs 1,00,000/- an dawng bawk. Best Player-ah Rochharzela Chhinga Veng chu thlan ni a, Rs 5000/- leh Trophy a dawng a, Fair Play leh Community-ah Thingsulthliah VC te thlan an ni a, Rs10,000/- ve ve an dawng a ni.