Arsenal manager Arsene Wenger chuan Inrinni zan Premier League-a Watford an hneh hnuin an result-ah a lawm tih a sawi a, Shkodran Mustafi leh Lucas Perez an lalut fel lek lek tawh tih a sawilang bawk.

Inrinni zana inkhelah hian Gunners tan Santi Cazorla, Alexis Sanchez leh Mesut Ozil-te'n goal an khung a, Watford tan Pereyra-a'n goal khat a khung ve bawk.

Inkhel zawh hnua an kawmnaah Arsenal manager Wenger chuan, "A pumpuia khaikhawm chuan kan khelhdanah kha a țha in ka hria. Kan khel mawi a first half-ah kan che țha."

"Second half-ah pawh chance kan la siam thei tho va, mahse Leicester kan hmachhawn țum ang bawk khan a tawp kan khar nalh thei lo."

"Minute 90 chhung kan duh angin kan awm thei lo va hei hi kan lo tawn țhan tawh a ni, mahse khaikhawm chuan kan khelhdan a țha a kan chak hi a lawmawm." tiin a sawi.

Cazorla penalty pet zawk chhan pawh sawifiahin French manager hian, "Inkhelh hma apiang hian penalty pettu tur pathum ka thlang ziah a, Walcott hi pet tawh lo turin ka ti tawp a nilo, pet tur zinga pahnihna (number two) a ni." tiin a sawi.

Wenger hian transfer chungchang a sawilang tel a, tunkar hian Mustafi leh Perez an lalut dawn tih a zep lo. ( www.inkhel.com)

Gunners manager chuan, "Kan lalut thei ve ve chuan ka ring a medical pawh an nei tawh. Ziahfel ngai ala awm a engtikah tak nge kan lakluh thu kan puanzar dawn ka hre lo. Mahse tunkar tir lam hi chuan anih theih ka ring." tiin a sawi.

* Pic: Getty