Mizoram State Sports Council Ruby Jubilee lawmna 1st Inter School Cricket Tournament 2016 final chu October ni 14, Zirtawpni khan Ramhlun Sports Complex-ah zawhfel a ni.

Final-ah Presbyterian English School, Siphir chuan run 56-in KV Multipurpose School, Durtlang hnehin an champion ta a ni.

Final-ah hian khuallian Pu C Laltlanthanga MSSC Secretary chuan India-ah nasa takin sports-in hma a sawn a, a bikin Cricket phei chu a lar tak meuh meuh a ni. Infiamna lama talent nei tha Mizo thalaiten sports kan luhchilh mek lai hian zirna kan thlahthlam tur a ni lova, sports leh Education hi thiam tak leh rem taka kan kalkawp tir a ni a, Inter School Cricket Tournament khel school hrang hrang zirlaite chu zirna thlahthlam lo turin a fuih bawk a ni.

1st Innings-ah Presbyterian English School, Sihphir Venglai-in run 88 siamin wicket 6 an hloh a, hei hi umin KV Multipurpose School, Durtlang chuan run 32 chiah an siam hman a, wicket hloh faiin an lehthal zo ta lo a ni.

He tournament-ah hian Team 11 an tel a, khual lian hian lawmman semin team champion Presbyterian English School, Siphir-in trophy leh Rs.5000 bakah certificate an dawng a, pahnihnain sumfai bakah trophy leh certificate dawng bawkin tel zawng zawng school-ten momento leh certificates an dawng theuh bawk a ni.

(adsbygoogle = window.adsbygoogle || []).push({});