India ram huap Mini National Volleyball Championship 2018 leh International Event pahniha Mizoram Taekwondo team medal lakte June ni 21, Ningani chawhma dar 11:00 khan Khatla YMA Hall-ah Mizoram State Sports Council chuan a hlawmin lawmpuina hun a a hmang.
April 24-28, 2018 chhung khan R.Dengthuama Multipurpose Hall, Mualpuiah 26th Mini National Volleyball Championship 2018 neih a ni a, Mizoram hmeichhe team chuan bronze medal dawngin mipa team chuan final-ah Manipur an hneh lova, silver medal an dawng. Kum 25 hnuah Mizoramin national level-ah medal an dawng leh ta a ni.
April 29-30, 2018 chhung khan Amguri, Assam-ah Goodwill Open Taekwondo championship neih a ni a, Mizoram chuan Poomsae leh Kyorugi-ah gold 21, silver 16 leh bronze 12 an dawng a, players 23 an kal a, official 4 an kal tel bawk. India ram state hrang hrang atangin team 23 an tel a.
May 22-24, 2018 chhung khan 2nd Kukiwon Cup, Indian International Taekwondo Championship chu Talkatora Stadium New Delhi-ah neih a ni a, players 1650 chuang telna he championship-ah hian Mizoram atangin Poomsae leh Kyorugi-ah players 48 an tel. Mizoram hi a pumpuiah team champion an ni a, Gold 16, Silver 14, Bronze 13, a vaiin medal 43 an dawng.
June Ni 2-4, 2018 chhungin Thimphu-ah Bhutan Open International Taekwondo Championship neih a ni a, Mizoram chu Poomsae(perform) inelna leh Kyorugi(fight) inelnaah Team Champion niin Poomsae inelnaah Gold 15, Silver 10 leh Bronze 8 an la a, Kyorugi-ah Gold 14, Silver 5, Bronze 8 an la bawk.
Mizoram aiawha medal hrang hrang late puala inkhawmah hian F.Lalthuamluaia, Addl.Secretary, SYS chu khual lian a ni a, khual lian chuan Sports hian mihring min ti hrisel a, a Pathian thu em em bawk a ni a ti. Kristian nun nen a inmil a, Pathian thua kan hmuh angin kan hmaa intihsiakna awm turah chhel leh huai taka kan beih a ngai. Kan tih a piang Pathian ropuina ni zel rawh se tiin Sports chu kan buaipui mek unemployment problem phuhrukna tha tak a nih thu leh a kaihruaitute pawh kan intuaithar zel a ngai a, taimakna, tumruhna leh chhelna nen a sang ber thleng zel tura kan inbuatsaih a ngai a ni a ti bawk.
Felicitation programme hi James Lalramnghaka, AE chuan a kaihruai a, MSSC chuan a tih thin danin medal la zawng zawngte hnenah lawmpuina thilpek a hlan leh theuh a ni.
(adsbygoogle = window.adsbygoogle || []).push({});