April ni 27, Ninga zan Mizoram Super League Season 3 khelh chhunzawm a ni a, Tuikual South chuan 77-71 in Khatla TBL an hneh a, Semifinal-a in tum tur a hriat ta a ni.
Tuikual South hian Semifinal-ah Table-a pahnihna Mission Veng Vikings an hmachhawn ang a, palina Khatla TBL hian pakhatna Zarkawt BCA an hmachhawn thung ang. Chanmari Hollow leh Zarkawt Serpents hian Relegation Playoff an khel dawn ta a ni. Semifinal hi May ni 4, Ninga zanah khelh a ni ang.
Tuikual South tan Palpreet Singh Brar chuan bul tanin, Khatla TBL tan Garry Gill leh Chris Solomon chuan bul an tan ve bawk. Garry Gill hian a dunk nghal nghe nge. First quarter tawp dawnah Khatla TBL American player Chris Solomon leh Tuikual South player Palpreet Singh Brar te in tihbuai vangin hnawh chhuah an ni. Palpreet Singh Brar chuan point 13 score-in Lalrohlua chuan point 7-a score ve bawk. Khatla TBL tan Vanlalnunsanga chuan point 8 score ve bawk mahse midangin an thlawp that tawk loh an tuar.
Second quarter-ah Khatla TBL coach cum player H Laldinsanga (Mapuia) rawn lut mahse danglamna a thlen thei lo. Tuikual South tan MS Dawngzela, Vanchuangpuia leh Lalrohlua te an thawh hlawk hle thung. Khatla TBL tan Garry Gill chuan point 7 score-in dunk leh mahse midangin a thlawp tha lo thung. Second quarter a zawh meuh chuan Tuikual South chuan 42-26 a hmahruaiin chawlh lawk an hmang.
Third quarter-ah Khatla TBL player Garry Gill chuan a dunk leh a, H Laldinsanga (Mapuia) chuan point 11 score mahse midangin an thlawp tha tawk lo. Tuikual South player Nicolas Daniel chuan a dunk ve bawk. F Zodinthara chuan a rawn thlawp that bawk vangin hmahruaitu zawkah an tang leh ta a ni.
Quarter hnuhnung berah chak zawk tur hriat har khawpin anin hneh tawk thung. Tuikual South lam hian turnover an ngah an tuar deuh a, Khatla TBL tan Jacob Laldinliana rawn langsar mahse Tuikual South tan Lalrohlua chuan an hmahruaina point-a rawn score hlauh a, Khatla TBL chuan hnehna chan ngei tumin theih tawp chhuah mahse hun pawimawhah H Laldinsanga (Mapuia) leh Eddie Zaithanmawia ten beisei an pha lo. Tuikual South chuan 77-71 in hnehna an chang ta a ni.
Inkhel pumpui thlirin
Khatla TBL hian an khel tha hle a, Garry Gill hian vawi thum zet dunk-in langsar a, H Laldinsanga (Mapuia) nen point 15 ve ve score mahse hun pawimawhah turnover an ngah bakah an thawh hona that tawk loh an tuar thung. Champion no mawi chawi leh an tum chuan in siam that an ngai ang.
Tuikual South hian champion turin theihna an nei tih an lan tir a, an thawh hona a tha hle bawk. F Zodinthara quarter tinah a tangkai hle. Palpreet Singh Brar nen point 13 ve ve score-in F Zodinthara hian rebound vawi 11 zet la in double double-a nei nghe nge a ni. An chakna a tan a thawh hlawk tak Lalrohlua hian point 20 zet a score ve bawk.
(adsbygoogle = window.adsbygoogle || []).push({});