May ni 16, Thawhleh zan khan R Dengthuama Indoor Stadium-ah Mizoram Super League Season 3 final game 1 khelh a ni a, Khatla TBL chuan 66-52 in Mission Veng Vikings an hneh. May 18, Ninga zanah game 2 khelh leh a ni ang.
Mission Veng Vikings tan American Ronald March chuan bul a tan a, Khatla TBL tan Chris Solomon leh Coach cum player H Laldinsanga (Mapuia) chuan bul an tan ve bawk. Chris Solomon hian double double-a nei thung.
Inkhel tan a ni a, TBL tan Chris Solomon chuan point 5 thawk chhuakin 3points vawi khat a nei a, quarter tawp dawn minute 1 ala awmin Akash Deep Hazara rawn lutin 3points vawi khat a rawn nei ve bawk. Vikings tan Lalrina Renthlei leh Lalruatkima te an langsar a, Lalrina Renthlei chuan 3points vawi khat a nei ve bawk. Ronald March chuan beisei a pha lo thung.
Second quarter-ah Vikings chuan hmahruai ve thungin Ronald March chuan point 8 hlawh chhuakin 3points vawi khat a neih bakah a dunk bawk. TBL tan H Laldinsanga chuan 3points vawi khat a neih bakah point 7 hlawh chhuak mahse, midangin an thlawp that loh an tuar a, Mission Veng Vikings chuan 29-27 in hma an hruai ta zawk a ni.
Third quarter-ah Khatla TBL hmahruaitu zawkah an tang thung. Chris Solomon chuan point 13 zet hlawh chhuakin 3points vawi khat a nei bawk. Lalrinzuala leh H Laldinsanga ten an thlawp tha hle. Vikings tan Ronald March langsar mahse Lalrina Renthlei leh Lalchhanhima ten an thlawp that tawk loh an tuar thung.
Quarter hnuhnung berah pawh TBL chuan hmahruai zelin Chris Solomon leh Akash Deep Hazara te an langsar a, Chris Solomon chuan point 10 hlawh chhuakin Akash Deep Hazara chuan 3points vawi khat a neih bakah point 6-a hlawh chhuak thung. Vikings tan Ronald March langsar ve bawk mahse midangin an thlawp that loh an tuar a, hun atawp meuh chuan Khatla TBL chuan 66-52 in hnehna an chang ta a ni.
Inkhel pumpui thlirin
Mission Veng Vikings hian an khel tha hle a, Ronald March leh Lalrina Renthlei an langsar a, third quarter-ah turnover an ngah bakah free throw an hlawh chhuah an lut thei lo. An thawh hona that tawk loh an tuar bawk. Champion no mawi chawi an tum anih chuan in siam that an ngai ang.
Khatla tan Chris Solomon chuan point a hlawh chhuak thei hle a, an chakna hnar a ni kan ti thei awm e. H Laldinsanga leh Akash Deep Hazra te sawi hmai chi an ni lo bawk. An thawh hona a tha a, presure sangah an talbuai lo a, chak phu zawk an chak a ni. Vawi thum a zawna champion no mawi chawi turin theihna an nei a, an kutah a in nghat thung. Chris Solomon hian point 30 zet hlawh chhuakin rebound vawi 13 zet ala bawk. H Laldinsanga leh Akash Deep Hazra hian point 11 ve ve an hlawh chhuak ve bawk.
(adsbygoogle = window.adsbygoogle || []).push({});