Mizoram Super League Season 3 final game 3 chu May 19, Zirtawp zan khan khelh a ni a, Mission Veng Vikings chuan 80-68 a Khatla TBL hnehin an champion ta a ni.
Game 1-ah Khatla TBL chuan 66-52 in hnehna chang mahse game 2-ah Mission Veng Vikings chuan 87-64 in an sawp thung a, game 3-ah Mission Veng Vikings chuan 80- 68 a hnehna changin a vawi khat nan Mizoram Super League Season 3 Champion no mawi an chawi ta a ni.
Mizoram Super League awm tirh atangin Khatla TBL chu an vawklallen a, season 1 leh season 2 champion ni mahse a season thumnaah erawh Mission Veng Vikings an champion ta a ni.
Khatla TBL tan Chris Solomon leh Coach cum player H Laldinsanga (Mapuia) chuan bul tan ve bawk mahse beisei an pha lo. Mission Veng Vikings tan Ronald March chuan bul a tan ve bawk. Vikings tan Michael F. Lalawmpuia chuan basket hmasa ber lutin quarter hmasa berah point 7 a hlawh chhuak a, Ronald March chuan vawi hnih lai a dunk bakah point 9 a hlawh chhuak ve bawk. Khatla TBL tan Chris Solomon chu quarter hmasa ber tawp lamah khel tha hlein point 8 hlawh chhuak bawk mahse midangin an thlawp that loh an tuar thung.
Quarter hnihnaah pawh Vikings chu hmahruaitu an ni chhunzawm zel a, Ronald March leh Michael F. Lalawmpuia chuan 3 points vawi khat ve ve an nei a, Albert Lalmuanpuia'n a rawn thlawp tha hle bawk. TBL tan Akash Deep Hazra rawn lut mahse beisei a phak lo. Gospel Lalthawmmawia chuan point 6 hlawh chhuak ve bawk mahse; midangin an thlawp that loh an tuar leh bawk. Second quarter a zawh meuh chuan Vikings chuan 40-29 in hma an hruai hem mai.
Quarter thumna tan a ni a, TBL tan Akash Deep Hazra a rawn khel tha hle a, point 12 lai hlawh chhuak mase Gospel Lalthawmmawia leh Eddie Zaithanmawia ten an rawn thlawp tha tawk lo a, Vikings tan Lalrina Renthlei, Ronald March leh Lalruatkima Sailo te an rawn che that ve bawk. Vikings hmahruaitu an la ni ta zel a.
Quarter hnuhnung berah TBL tan Chris Solomon leh Akash Deep Hazra rawn lutin an thawh hlawk dun hle a, Chris Solomon chuan point 11 hlawh chhuakin Akash Seep Hazra chuan point 5 a hlawh chhuak thung a, H.Laldinsanga (Mapuia) chuan 3points vawi khat nei bawk mahse, Vikings tan Ronald March leh Lalrina Renthlei an thawh hlawk ve bawk si a. Ronald March chuan point 10 hlawh chhuakin; Lalrina Renthlei chuan 3points vawi khat a neih bakah point 6 a hlawh chhuak thung a, hun a tawp meuh chuan Mission Veng Vikings chuan 80-68 in hnehna an chang ta a, MSL vawi thum neih tawhah a vawi khat nan Vikings chuan Champion No mawi an chawi ve ta a ni.
A pumpuiah Mission Veng Vikings tan Ronald March chuan thawh hlawk hle mahse an chakna hnar erawh an thawh hona tha a ni. Hnehna an chan theih nan Michael F Lalawmpuia, Moses Zorema, Lalrina Renthlei leh Lalruatliana Sailo te sawi hmaih theih an ni lo.
Ronald March chuan point 27 score-in rebound vawi 8 a la a, assist vawi 8 a nei bawk. Michael F Lalawmpuia chuan point 14 score-in rebound vawi 7 a la thung a, Lalrina Renthlei chuan point 13 score-in rebound vawi 9 a la thung a, Lalruatliana Sailo chuan point 8 score-in rebound vawi 5 a la ve bawk.
Khatla TBL tan Chris Solomon leh Akash Deep Hazra te thawh hlawk hle mahse, TBL an chakpui thei lo a, An thawh hona that tawk loh an tuar tel bawk. Chris Solomon chuan point 23 score-in rebound vawi 5 a la a, Akash Deep Hazra chuan point 20 score-in rebound vawi 5 a la ve bawk.
Champion team Mission Veng hian Rs 1,30,000/- leh trophy an dawng a, pahnihna Khatla TBL hian Rs 70,000/- an dawng thung. Pathumna Zarkawt BCA chuan Rs 30,000/- an dawng a, palina Tuikual South chuan Rs 25,000/- an dawng a. Pangana Chanmari Hollow hian Rs 20,000/- an dawng a, Zarkawt Serpents hian Rs 15,000/- an dawng bawk a ni.
Most Valuable Player-ah Ronald March Mission Veng Vikings chu thlan a ni a, Best Defensive Player-ah Moses Zorema Mission Veng Vikings chu thlan a ni thung. An pahnih hian Panasonic TV an dawng ve ve a ni.
Reporter : PC Lala