McDowell's No.1 Soda Mizoram Premier League season 5 semi final thawh khatna khelh a ni a, December ni 1, 2016 khan Bethlehem Vengthlang FC leh Chanmari West FC te chu 1-1 in an inhnehtawk a ni. Semi final hi vawi hnih khelh a ni dawn a, away goal rule hman a ni dawn lo. December ni 8, 2016 hian a thawh hnihna team hnihte hian an khel dawn a ni.

Goal hnihte hi first half minute 10 hmaa lut a ni a, tan atanga minute 6-na lekah set piece atangin Apuia chuan Bethlehem Vengthlang FC tan a khung a, he goal a luh atanga minute hnih lekah Bethlehem Vengthlang FC goalkeeper tihsual nangchingin Dampuia chuan Chanmari West FC si phurh a rul a, 1-1 in an inhnehtawk ta a ni. Zuia Hnamte chu man of the match atan thlan a ni bawk.

Bethlehem Vengthlang FC 1-1 Chanmari West FC

(Lalrammuanpuia 6') (Laldampuia 8')

Man of the match : Zuia Hnamte (Chanmari West FC)

Bethlehem Vengthlang FC XI : Malsawmdawngzela, H. Lalhlimpuia, K. Lalmalsawma, Lalrammuanpuia, Hmingthanmawia, Laldinliana Varte, Lalrintluanga, Samson Ramengmawia, PC Laldinpuia, Lalnunmawia, Zothanpuia.

Chanmari West FC : Lalruatpuia, Toky Zomuanpuia, Racy K Lalremmawia, Vanlalzuia Hnamte, R. Lalawmpuia, Reuben Zosangpuia, K. Lalnunzama, Lalbiakhlua, R. Laldanmawia, Laldampuia, H. Lallianzama.

Goal a lut hma hle a, tan atanga minute 6-na lekah Bethlehem Vengthlang FC chuan corner an hlawhchhuak a. He corner atanga ball lo kal chu tuma chan loh Apuia chuan 6 yard box atangin chiang set sawtin a tauh goal ta a ni.

Chanmari West FC hian si an phur rei lo. 8 mins-ah mual dinglam atang ball thlawk chu free taka man theihna hun Bethlehem Vengthlang FC goalkeeper Mala chuan a nei. Easy ball nia lang a ni a, box chhung a nih avangin Bethlehem Vengthlang FC goalkeeper Mala khan awlsam takin a man thei. Chutih laiin a kein a dang a, a dang per, pen 10 vel daiha hlaa awm Dampuia a rawn tlan. Hetah pawh hian Mala hian a tihsual siam thatna hun a la nei tho, tlan phei sela, khawi zawng pawhin na takin a la pet hman.

Mahse goal vengin a tawlh let, Mala hian Dampuia pe goal rawh a ti niin a ngaih theih. Chutiang khawp chuan he chetsualna hi a mak! Dampuia lah chuan awlsam lutukin a chip a, a goal mawi phian bawk si a. Dampuia chuan goal 13 a khung ta a, Apuia goal a rul a ni.

Minute 15 an khelh tlin hma hretin mual dinglam sir atangin Danmawia chuan tha zetin a cross a, Bethlehem Vengthlang FC defender-te an chesual, an clear fuh lo, pen 9 vel lek atangin kawh zetin Lianzama chuan a shot, mahse a over hlauh mai. Darkar chanve an khel tling tihin Bethlehem Vengthlang FC pawhin chance tha zet an nei a. Mawitea chuan mual dinglam atanga ball tha zet chu box chhungah dawngin a insiam rem fe hnuah a shot, Chanmari West FC defender Awmpuia chuan a lo block tha kher mai.

Second half-ah goal mouth action vawi khat chiah kan hmu a. Box pawn 30 yards atangin Valtea chuan kawh zetin top corner-ah a thlawh phei, a goal ngei dawn nia a lan laiin first half-a chesual Mala chuan mawi zetin a lo beng per hman, save ropui tak a ni chiang e. Goal dang a lut tawh lo, 1-1 in an inhnehtawk ta a ni.

Chanmari West FC hmatawng an hmuhnawm hle a, Danmawia inhliam erawh second half-ah Chanmari West FC-in an tuar a, an goal bawh a na tawh lo. Second half hun tawp lamah kha chuan inhnehtawk kha an pawi tilo ve ve a, first half tan tir game ang kha kan hmu tawh lo, half time ang chauh a la ni a, karleh lamah a thawh hnihna an khel leh dawn, chu erawh a hmuhnawm tak zet dawn a ni.