Monaco chuan Zirtawpni zana Metz hmachhawn tur squad an puanah PSG nena sawizawm mek Kylian Mbappe an ti tel lo.

Kum 18 mi Mbappe hi French chanchinbu L'Equipe chuan PSG-in an lalut fel teuh tawh hle niin an tarlang a, Real Madrid leh Manchester City pawhin lakluh an duh tih thawm a awm ve reng bawk.

French forward hi Pathiannia Dijon an hmachhawn țumin substitute-ah dah niin luhtir a ni lo va, Dijon hi 4-1 in an hneh.

Mbappe khelhloh chhan hi sawifiahin Monaco manager Leonardo Jardim chuan, "Player-te hi kan hrem ngai lo va thil dik pawh a nilo. Venhim hi tihdan țha zawk a ni."

"Kum 18 mi chauh chungah thuthang a tam viau chuan venhim hi kan kut zala tla a ni bawk. Kylian hi 100% in ala inpeih lo va khel thei khawpin ala țha lo. Mahse hetiang hi chu kum 18 chauh lakah chuan beisei ve tur a ni." tiin a sawi.

Mbappe hian French season thara an game hmasa pahnih chu a khel a, a game hnih a khelh zingah hian French Champions' Trophy-a PSG an hnehlohna pawh kha a tel.

July thla khan Monaco hian an thu lo va Mbappe lo dawrtu an awm tih sawiin FIFA hnenah zualko an tum tih an sawi a, hek an tum club zingah hian Manchester City pawh an tel tih BBC Sport chuan an tarlang.