Mizoram Basketball League sang ber Mizoram Super League chu a hmawrbawk mek a ni a. Zanin khan Hawla Indoor Stadium-ah Final game thum khelh tura game khatna khelh a ni a, Tuikual South chuan champion lai Khatla TBL chu 71-78 in an hneh a ni. Team pahnihte'n fans an nei tha dun a, Hawla Indoor Stadium-ah mipui leng lo khawpin an inhnawh a ni. Inkhelh tan hmain Feli Thangluah chuan "Ro min relsak ang che" tih hla nalh zetin a thlawh a, Feli zawi zawh hian team pahnih Dance Crew-te tangkawpin lam hmuhnawm zet min entir leh bawk a ni.
Khatla TBL 71-78 Tuikual South.
( Vanlamuana 28 Points' 7 Rebounds' 3 Steals') (Rakesh Sangwan 20 Points' 11 Rebounds')
First quarter tan a ni, Final a point hmasa ber niturin Tuikual captain Dina chuan 2 point a score a ni. TBL tana captain Lana-a'n point a rawn nei chhunzawm ve nghal zat bawk. Tuikual South player-te final boruakah an zam lo a, Tuikual fans-te'n an team an auphur thiam hle. TBL tan Vanlalmuana a langsar a, first quarter-ah hian point 7 score-in quarter khatna a score hnem ber a ni. Nimahseka Tuikual player-te an che tha rual a. Dina, Rohlua leh Chp-a te'n point 6 theuh an score avangin Tuikual hian quarter khatna zawhah 22-18 in hma an hruai a ni.
TBL tan Coach cum Player Mapuia inhliam vangin a inlan thei lo a, Mapuia awm loh hi TBL game-in a tuar hle. Second quarter-ah pawh TBL player-te an che hlei thei lo a, tul lo taka 3 points shoot an ching thin avangin Tuikual an um pha thei meuh lo. Gospel-a khel a hmuhnawm a, City Police hna hmu thar TBL forward hi Tuikual playe-te'n dan ngaihna an hre meuh lo a, Second quarter-ah point 10 zet a score a ni. Tuikual lamin Rakesh-a an luhtir a, Beisei angin Rakesh-a a che tha lo a, Haryana tlangval hian Tuikual South game a tichhe hneh hle. Rohlua lhe Chp-a te'n second quarter-ah Tuikual hma an hruai pui thei hram a, Tuikual hian second quarter zawhah 37-38 in hma anla hruai thei hram a ni.
Third quarter-ah TBL game-in hma a sawn hle a, Mapui-a'n a naute half time chawlh lawkah khelh dan tur a zirtir tha hle tih a hmuh theih a ni. TBL tan Guard Vanlalmuana third quarter-ah hmuhnawm khawpin a khel a, 3 point vawi thum lutin quarter thumnaah hian point 16 zet a score hman a ni. Tuikual tan Rakesh-a leh Chp-a te'n point 12 score ve bawk mahse third quarter a tawp meuh chuan TBL hian 60-54 in Tuikual an lehthal hman a ni.
Quarter tawp berah basketball game hmuhnawm tak team pahnihin min entir a, chak zawk hriat harsa khawpin an inlehthal tawn zawk zawk a ni. Champion lai TBL tan Gospel-a bawk a tangkai leh a, Point 8 a score hman a ni. TBL player dang te'n chet ngaihna an hre lo a ni ber mai. Vanlalmuana chu quarter tawp lamah inhliam avangin zawnchhuah a ngai a, Muana awm loh TBL lamin an tuar hle. Quarter tawp berah Rakesh-a'n a theihna tak tak a pho lang a, Ft 6'6 zeta sang Rakesh-a hian point 11 zet a score a ni. Rakesh a pui turin captain Dina a awm bawk a, TBL player hlui hian point 8 a score ve bawk.
TBL lamin Mapuia awm loh an tuar tih a hriat takzet a, Mapuia tel loin TBL player tha te'n khelh ngaihna an hre meuh lo a ni ber. TBL tan Vanlalmuana leh Gospel-a an khel tha a, Nimahsela TBL hian MSL Season 2 a champion nawn tur chuan an player dang te chet that an mamawh hle ang. TBL tana luhai thlak tur chu Mapuia inhliam laia Vanlalmuana inhliam ve leh hi a ni. Muana hi a teammate-te zawnchhuah ngai khawpin a inhliam a, Bench-ah pawh a rawn let tawh lo a ni.
Tukual South hi MSL Season 2 a team hmuhnawm ber pawl leh fans nei tha ber tih ngam an ni a. Tuikual tantute hi khawlum hnuiah pawh kawr phelh meuh an au peih a ni. Tuikual lamin a hun takah Rakesh-a an chah chho a, Captain Dina leh Chp-a ten an thlawp tha hle bawk. Rakesh-a beisei angin khel tha nghal lo mahse a zam lo a, League sang zawka tawnhriat a neih tawh hmang tangkaiin a hun takah Tuikual tan phengphehlep mawi takah a chang thei a ni.
