October ni 23, Thawtanni tlai khan Mizoram Premier League Season 6 Round 10 match hmasa ber Mizoram Police FC leh Ramhlun North FC te inkhelah Mizoram Police FC chuan 3-2 in Ramhlun North FC an hneh.

Mizoram Police FC tan Lalbiakhlua chuan goal hnih a khung a, Lalsangbera chuan goal khat a khung ve bawk. Ramhlun North FC tan Rosangliana leh Lalliansanga chuan goal khat ve ve an khung.

He inkhelah hian Mizoram Police tan a goal hnih khungtu Lalbiakhlua chu Man of the match-ah thlan a ni.

Phase 1 Round 7-ah Mizoram Police FC hian 4-3 in Ramhlun North FC hi an hneh tawh a, an in tawn vawi hnih naah Mizoram Police FC chuan hnehna an chang nawn leh ta a ni.

Mizoram Police FC 3-2 Ramhlun North

(Lalbiakhlua 14', 79', Lalsangbera 87') (Rosangliana 45+2', Lalliansanga 89')

Mizoram Police FC hian coach thar Lalbiaksanga Colney (Bsa) hnuaiah match nga chhungin point 13 an hlawh chhuak tawh a, hneh loh anla nei lo thung. Ramhlun North FC a tang a an lak luh TATA Academy chhuak Toky Zomuanpuia la lut mahse bul a tan lo thung. Khelh tawhah point 14 neiin table-ah pahnihna an hauh rih a ni.

Ramhlun North FC hian Samson Ramengmawia hnuaiah vawi thum hnehna chang tawhin vawi hnih draw an nei tawh a, vawi nga an tlawm tawh thung. Striker Lalremruata hian goal sarih khung tawhin top scorer a ni mek bawk. Liberian defender Korhena chuan bul a tan mahse hnehna an chang lo thung. khelh tawhah Point 11 an nei mek a ni.

Inkhel tan a ni a, team pahnih te an innawe tawn zak zak hnuah Ramhlun North FC chuan goal thunna hun tha nei hmasa zawkin V Lalchhuanawma chuan goal zawnah a pet lo.

Mizoram Police FC pawhin goal thunna hun tha nei ve bawkin Zosangliana goal shoot chu Ramhlun North keeper Sangpuia chuan a dan sak thung.

Mizoram Police FC chuan nawr chhunzawmin minute 14-ah Zoramthara freekick pet Ramhlun North FC keeper Sangpuia dan per nangchinin Biaktea chuan goal-ah chantirin an hmahruaina a thun.

Ramhlun North FC chuan nawr letin Lalmuanawma leh Rosangliana chuan an siphurh sutna hun tha hlah thung.

Ramhlun North FC chuan nawr chhunzawmin hun tawp dawn added time-ah Rinfela corner pet tha zet chu box chhung a awm Rosangliana chuan tauh lutin an siphurh a rul a, 1-1 in chawlh lawk an hmang ta a ni.

Second half-ah tan a ni a, Police chuan inkhel thunun zawk mahse, Ramhlun North FC chuan goal thunna hun tha nei hmasa zawkin Remruata chuan a hun tha a hlah.

Mizoram Police FC tan Biaktea chuan goal thun belhna hun tha a hlah ve bawk. F Lalrinpuia (Valpuia) leh Rinchhana lutin an goal bawh ana sawt a, minute 79-ah Mual veilam sir a tang a, Fakzuala ball pek tha zet chu Biaktea bawk chuan tauh lutin an goal hnihna a khung.

Ramhlun North FC tan Muansanga leh PC Vanlalhmangaihzuala lut ve bawk mahse danglamna erawh an thlen thei lo thung.

Police chuan nawr chhunzawmin minute 87-ah mual veilam sir a tang a Valpuia ball pek tha zet chu box chhunga a awm Sangbera chuan chiang zet a pet lutin an goal thumna a thun leh bawk.

Ramhlun North FC tan huntawp dawn minute 89-ah Liansanga chuan an goal hnihna a khung ve bawk. V Lalchhuanawma chuan an siphurh sutna hun tha nei mahse, Police keepwr JK Malsawma tan hna hautak erawh a siam lo thung a, hun tawpin a nang zui ta a ni.

Ramhlun North FC hian October ni 27, Zirtawpni dar 3:00-ah Chanmari West FC an hmachhawn ang a, zan dar 7:30-ah Mizoram Police FC hian Chanmari FC an hmachhawn thung ang.

Reporter : PC Lala