Fencing leh Judo team medal lakte lawmpuina hun hi October ni 19, Nilaini chawhma dar 11:00 khan Mizoram State Sports Council chuan infiammite inpui, MSSC Office, Upper Khatlaah a buatsaih a, he huna khual lian Pu Lalrinfela, Joint Secretary chuan, " Olympic hi infiammite thlen theih sang ber leh khawvela inelna lian ber a ni a, infiammite tum ber a nih angin keini pawhin tel mai ni lo, medal lak ngei kan tum tur a ni. Olympic-a medal lak hi a har takzet a, tel pha hrim hrim nih pawh a har takzet a ni. Mizote hian nasa takin sports-ah hma kan sawn tawh a, hmabak erawh kan la nei thui hle a, chuvangin vawiina kan beih leta kan beih loh chuan kan hlawhtling thei lovang" tiin Mizoten talent kan nei tha a, tih takzeta kan beih phawt chuan kan hlawhtling ang tih hi ka ring tlat a ni a ti.
Pu H.Thangchungnunga, Sports Promotion Officer chuan, " Mizo infiammite hian Game hi Competition atan chauh kan khel thin a, naupang leh thalaite chauh khelh tur a ni bik lo. Kan zavaiin, naupang atanga puitling, pitar leh putar thleng pawha infiamna kan tuipui vek a pawimwh a ni' tiin sawrkar tanpuina ringawt nghak lova, mahni insengsova kan luhchilh hunah kan hlawhtling leh zual ang a ti ve bawk.
October nin 8-11, 2016 chhung khan 13th Cadet & XVIII Sub- Junor natonal Fening championship chu Gwalior, Madhya Pradesh-ah neih a ni a, Individual Foil-ah Emmanuel C.Ramengmawia, Sihphir chuan bronze medal dawngin team inelnaah Lalhruaitluanga, VL.Malsawmkima leh Emmanuel C.Ramengmawia te chuan bronze medal an dawng bawk.
October ni 13-16, 2016 chhung khan Patna, Bihar-ah Sub Junior National Judo Championship neih a ni ve thung a, Mizoram aiawha fehchhuak Judoka 23 zing atangin mi pathumin medal an dawng phak a. Zonunsangi chuan below -48kg-ah silver dawngin Maranatha chuan below 35 Kg-ah bronze a dawng a, Isak Rochanmawia chuan below 50 Kg-ah silver medal a dawng ve bawk a ni.
Mizoram team te lawmpuina hun hi Pu James Lalramnghaka, AE chuan kaihruaiin Judo team manager Lalrengpuia leh Mizoram Fencing Association President Pu K.Biakthianghlima-ten team fehchhuahna report an pe a, medal latute hnenah MSSC chuan lawmpuina thilpek a hlan leh theuh a ni.
(adsbygoogle = window.adsbygoogle || []).push({});