Zonet Cable Pvt. Ltd leh Mizoram State Mixed Martial Arts Association (MISMA) tangkawpin an buatsaih Mizoram Fight League season 1 chu zawh a ni ta a, Fight Night hnuhnung ber hi December ni 14, 2017 (Zirtawpni) zan khan Pachhunga University College Auditorium-ah ropui taka neih a ni.
Mizoram Fight League season 1-ah hian Fight Night vawi 4 a awm a, fight night neih hma niah Contender Fight neih thin a ni bawk. Fight Night hnuhnung ber hi MFL4 niin, team 4 (Promise Strivers, BCA Brawlers, Juggernaut MMA leh DSZ Fight Club) te chu season tluana an inel hnuah team point hmu sang ber Promise Strivers te chu an champion ta a, DSZ chu pahnihna niin, Juggernaut chu pathumna an ni a, BCA chu palina an ni ta a ni.
MFL4-ah hian mipui an thahnem hle a, Minister zahawm tak Nl. Vanlalawmpuii Chawngthu chuan Fight Night khuhhawnna a nei nghe nghe. Main Event-ah Jack Lalsangliana leh Lalfamkima te an inhmachhawn a, he Walterweight fight hmuhnawm takah hian Lalfamkima chu chungnung chho hle mahse Round 2, 1:36-ah Jack-a chuan TKO hmangin a hneh ta a ni. Co-Main Event-ah Dengthanchhunga leh Lalramdinthara te an inhmachhawn a, Manova chuan awlsam takin Round 1, 2:50-ah Submission hmangin hnehna a chang bawk.
MFL4 Fight Report Kimchang :
1. FlyWeight :
Juggarnaut vs BCA
PC Lalhminghluna (Bunghmun) def. Lalbiaksanga (Tuikual North) {Unanimous Decision}
A tir atangin an inbawh nghal a, ground game an khel nghal. Chungnung zawk awm lovin an inlehthal zak zak a, Round 1-ah na takin an inkhawih hman lo. Round hnihnaah ding chungin an insual a, Lalbiaksanga chuan chiang set sawtin a hnek, PC Lalhminghluna a thal tep, Biaksanga'n a bawhzui lo hlauh, hemi hnu hian PC-a chuan ground game a khelhpui, a takedown, ground and pound a nei hman tep, Round hnihna a zo hman hlauh mai.
Round hnunhnung berah an fimkhur dun hle a, an dawng dun zauh zauh bawk, PC-a'n ground game a khelhpui a, a chung zawkah a tang deuh reng, hun a tawp a, Unanimous Decision-in PC Lalhminghluna chuan hnehna a chang ta a ni.
2. Bantamweight :
Juggernaut vs BCA
Lalnunpuia (Seling) def. David Zairemthanga (Zemabawk) {Unanimous Decision}
A tir atangin an inngam nghal bian bian hle, David-a chuan Lalnunpuia mitko a hnek thi nghal, Nunpuia chuan a takedown a, ground game an khel nghal, rei ngial an inbawhbet tawn a, Round 1 tawp dawn tepah David-a chuan RNC na hun remchang a nei, mahse Nunpuia a inveng tha hle.
Round hnihnaah fight a hmuhnawm hle a, chiang set sawtin Nunpuia'n a hnek, mahse David-a tuar a chhel. Nunpuia chuan takedown a tum thin a, mahse David-a takedown defence a tha hle. Round tawp dawnah Nunpuia chuan armbar lock a tum, mahse a tifuh tawk lo, hun a zo hman.
A tir lamah an innuai bawrh bawrh avangin Round tawp berah an tha a thum deuh ni tur a ni, ground game awmze nei lo an khel, hetih lai hian Lalnunpuia'n takedown mawi tak tak vawi thum a nei a, David-a'n RNC na hun tha nei thin bawk mahse Nunpuia a inveng thiam hle. Hun a tawp a, Lalnunpuia chuan Unanimous hmangin hnehna a chang ta a ni.
3. Featherweight
Juggernaut vs BCA
Emmanuel Lalthianghlima (Lunglei) def. Lalbiakthanga (Ramthar North) {Submission, RNC Round 1 2:16}
A tir lamah ke an hmang, Lalbiakthanga'n vawi hnih khat a pet hnuah Emmanuel-a hmaiah chiang takin a hnek. Ground game-ah an lut chhunzawm a, rei an khel hman lo, Emmanuel Lalthianghlima chuan minute 2 leh second 16-ah RNC hmangin hnehna a chang ta a ni.
4. Flyweight:
Juggernaut vs BCA
Pathian Malsawmdawngliana (Kawrtethawveng) def. Ngursaimawia (Luangmual) {Submission, RNC Round 3 1:24}
Ngura hi Muaythai background nei a ni a, PMS-a hi Taekwondo lam a ni, technique inang tak an nih avangin an inhlau tawn dun hle a, rei fe an inveh thin a, round tir lamah fight-in beisei a phak lo hle. Ke hmangthiam ve ve an ni a, an han inpet deuh zak zak a, cage-ah an innawr bet bawk. Round thumnaah Ngura chuan guillotine choke neih a tum, mahse a tifuh thei lo. Round 3, minute 1 leh second 24 naah PMS chuan takedown a neih hnuin a RNC nghal a, Ngura a tlawm ta ni.
5. Lightweight :
Promise Striver vs DSZ
Vanlalchhuanga (Dawrpui Vengthar) def. Lalruatkima Pudaite (Falkland) {Unanimous Decision}
Fight hmuhnawm tak an khel a, ground game-ah an lut nghal, Vanlalchhuanga chuan triangle choke a tum, a tifuh hle, mahse Round 1 a zo hman, Ruatkima a vannei hle. Round hnihnaah ground game an khel chhunzawm a, an inlehthal zak zak, chungnung zawk an awm lo, Round tawp dawnah Vanlalchhuanga chuan armbar lock a tum, a man fuh hle, mahse hun a zo leh hman hlauh mai.
Round tawp berah pawh ground game khelh ni lehin Ruatkima chuan ground and pound vawi hnih a nei hman, mahse Chhuanga tan chauhna tham a ni lo. Hun a tawp a, Unanimous Decision-in Vanlalchhuanga chuan hnehna a chang ta a ni.
6. Featherweight:
Promise Strivers vs DSZ
Lalnunsiama (Lunglei Rahsi Veng) def. Lalruatdika (Luangmual) {Unanimous Decision}
Ding chungin an insual, an dawng dun siah siah mai, a tir atangin a hmuhnawm nghal hle a, Lalnunsiama'n thahrui a ngah zawk, cage-ah a nawr bet a, a hnek nual, Ruatdika hnar a thi. Round hnihna tawpah Nunsiama'n ground and pound a nei, a hnek hnem hman hle, mahse hun a tawp hman tlat mai.
Round thumnaah Siama'n a bawhbet nghal a, chhut mawlh mawlh a tum, mahse Ruatkima a lo inveng thiam, a dawng tam lo hlauh. Siama chuan hun remchang a hmu ta, RNC hmangin a rek ta vang mai, hun tawp dawn second sawm chhung Siama'n a rek a, Ruatkima chuan hun tawp a nghak thleng thei hlauh. Unanimous decision-in Lalnunsiama chuan hnehna a chang ta a ni.
7. Featherweight :
Promise Strivers vs DSZ
C. Lalduhawma (Durtlang Leitan) def. Lalchhuanmawia Hmar (Republic Vengthlang) {Unanimous Decision}
Technique-ah an tha dun hle a, cage-ah an innawrbet a, ground game-ah an lut, chungnun zawk an tum ve ve, Lalduhawma chuan RNC-na hun tha a hmu, mahse rang taki maiin Lalchhuanmawia a talchhuak. Round hnihnaah ding chungin an inbei, Lalduhawma hi boxing background nei a nih avangin Lalchhuanmawia'n ground-a luhpui tum mahse a tho leh zel a, Lalduhawma hian a kuttum dinglamin a hnek hnuah a veilamin a chhuzui thin, Lalchhuanmawia'n a dawng nual.
Round thumnaah Lalchhuanmawia'n Ground game a khelhpui ta tak tak, hetih lai hian Duhawma a inveng thiam hle a, a duh angin Chhuanmawia'n a khawih thei bik lo. Hun tawp dawn tak takah Chhuamawia chuan RNC a nei, second 10 chiah a awm tawh, Lalduhawma tlawm thei dinhmunah ding mahse a tawp thlengin a tuar a, a tuarchhuak ta. Unanimous Decision hmangin C. Lalduhawma chuan hnehna a chang ta a ni.
8. Bantamweight :
Promise Strivers vs DSZ
Dengthanchhunga (Kulikawn) vs Lalramdinthara (Thenzawl) {Submission, Arm Bar. Round 1 2:50}
Ramdinthara'n a tir atangin a nawr nghal, tawnhriat ngah Manova pawh a dak zauh zauh, mahse Ramdina hnek a nat tawk loh avangin Manova tan buaina tham a ni lo. Manova chuan ground-ah a luhpui ta, a chhu zui mawlh mawlh a, chutah armbar lock hmangin minute 2 leh second 50-naah a elh ta, Ramdinthara a tlawm ta a ni.
9. Welterweight :
Promise Strivers vs DSZ
Jack Lalsangliana (Lunglei) def. Lalfamkima (Diakkawn, Kolasib) {TKO, Round 2}
Ding chungin an inhnek bian bian nghal, fight hmuhnawm tak a ni, Famkima chuan Jack-a beng a hnek thi sak, a tir lamah Jack-a'n dawng nual mahse Round 1 tawp lamah Jack-a'n a hnek chhuak hnem ve a, Famkima pawhin a dawng nual.
Round hnihnaah pawh an inhnek dun leh ngat ngat a, Jack chuan a kut veilamin Famkima mit zawnah a hnek thawi thuak, chumi hnuah a kut dinglamin a hrut chhunzawm leh, Famkima chuan a mit a dawm nghal, Jack chuan chhutzui a tum, vawi khat a hnek hman, referee a lo tlazep a. Jack chuan TKO hmangin Round 2, 1:36-ah hnehna a chang ta a ni.
He fight-ah hian Famkima chuan, "Ka mitah min kawm," tiin referee hnenah a complain a, a lungawi lo hle nghe nghe. Referee pawhin Jack-a chu chak zawkah puang tawh mahse video replay en leh phawt turin Judge-te a hriattir a. Hetah hian a lo kawm a ni tih a lan chuan fight chhunzawm leh tur a ni, Zonet Cable Pvt. Ltd crew ho chuan fiah fel fai takin Big Screen-ah Replay an rawn pe a, referee chuan a thutlukna chu a dik a ni tih a hmuh hnuin chak zawkah Jack Lalsangliana chu a puang zui ta a ni.