Mizo inchaipui Title Fight chu November ni 16, Nilaini khan AR Lammualah khelh a ni a, Palian inchaiah Lalsangliana chuan Title kawnghren a humhim a, Pate inchaiah Lalchhanhima Saitual chuan Title kawnghren a humhim ve bawk. Mizo Palian leh Pate inchai hma hian Palaihawl inchai bakah Nute leh Nulian an inchai hmasa a, hmeichhia hi Round 5 an inchai a, mipa erawh Round 10 an inchai thung. Champion lai te hian an mahni chotu an hneh vek a ni.
Inchai vawikhatna:- Palaihawl inchaiahah R Lalrinawma East Lungdar leh Lalmalsawma Kolasib te inchai hmasa berin Round 10-ah Rinawma East Lungdar chuan hnehna chang vekin a champion ta a ni.
Inchai vawihnihna:- Nute inchaiah Serchhip khua ve ve an inhmachhawn a, Champion lai Vanlalbiakdiki chuan amah chotu PC Lalthungheti chu Round 5 khelhah hnehna a chang vek a, Title a humhim ta a ni.
Inchai vawithumna:- Nulian champion lai Lalvenhimi Khawhai chuan amah chotu F Lalmalsawmi Bawngkawn chu Round 5-ah point 2-a chakin Lalvenhimi chuan Title-a humhim ve leh bawk.
Inchai vawilina:- Pate inchai champion lai Lalchhanhima Saitual, 39th Assam Rifles Battalion leh amah chotu Lalawmpuia Thenzawl inchai ahmuhnawm a, mizo inchai game awm ze nei tak min hmuh tir bakah game-a rangin an tuan a tha a, an fitness-a tha bawk. Round 7 naah Lalchhanhima chuan amah chotu Lalawmpuia chu bawh betin referee in vawi 10-a chhiar a, point 10 hmuin; he a point hmuh hi chhanhima hian chakpui nan a hmang ta ni.
Inchai hnuhnung ber:- Palian inchai Lalsangliana upper Republic Excise dept chuan amah chotu PB Lalnienga Saitual chu hneh sawh takin a hneh a, Round 10 khelh turah Round 8 khelh a ni a, Lalsangliana hian Round tinah hnehna chang vekin, technical knockout-in Round 8-ah PB Lalnienga chu a tlawm a, Lalsangliana chuan Champion Title-a hum nawn leh ta a ni.
Sangliana hian mipui te hmuh nawm tih theih tur chi inchawi kan inbawhbeh leh innawr chhuah te min hmuh tir a, 110kg-a rit, Amah chotu Nienga a chawikang te, a bawhbeh te kha a ropui hle a ni. Sangliana hian Round tinah a chungnung zia ati lang chiang hle bawk. Amah chotu Nienga hian Round 8 naah a awm ruh a tih nat vangin medical doctor leh technichal official ten khel chhunzawmlo turin an ti ta a ni.
