October ni 21, 2016 (Zirtawpni) khan Mizoram State Mixed Martial Arts Association (MISMA) leh Zonet Cable TV Pvt.Ltd te chuan Zonet Office-ah Mixed Martial Arts Event lian JSJ Fight League (JSL) buatsaih turin thawhhona thuthlung an ziak.
MISMA hian February 2016 khan JSL 1 hlawhtling takin Millennium Centre Roof Top-ah an lo huaihawt tawh a. November ni Ni 5 zanah JSL 2&3 a buatsaih leh dawn a, MZU Multipurpose Hall-ah he event hi buatsaih a ni dawn a ni. MISMA leh Zonet Cable TV Pvt.Ltd te chuan Mizoram thalaiten Mixed Martial Arts lama eizawnna tham thiamna an neih theih nan thawhhona an nei chho dawn ta a ni.
JSL hi Mizorama MMA gym changtlung ber JSJ FitPro neitute inpekna zara puitling thei a nia. JSJ FitPro Proprietor Dr. Joel Lalnghakliana Pautu chu MISMA Patron leh North East India MMA Association (NEIMA) President a ni. Sawrkar puihna awm miah lovin Mizoram chu sawi loh India hmarchhak ramah hetianga sum nuaih tam tak chuang event khata seng a, fighter te hma khua ngaih vanga sum theh chhuahna hi India ramah a vawi khat thlenna a ni. JSL 2 leh 3 pawh hi Dr. Joela leh a unaupa Dr. Jeremy Pautu te inpekna vang liau liau a ni a, MISMA chuan an chungah an lawm thu an sawi a, Mizo thalaite tana mi inpe zo anni ang hi future event atan rawn chhuak zel se an duh thu an sawi bawk.
Zonet Cable TV Pvt.Ltd hi Mizo thalaite tana tha thawh hlawk tak an ni a, Mizoram Premier League leh Mizoram Super League a hlawhtlin theih nan tha an thawh hlawk hle. MMA lamah pawh phur takin an che chhuak leh ta a ni.
Thawhhona thuthlungah hian MISMA President Pu R Zosangliana leh Zonet Cable TV Pvt. Ltd atangin Managing Director Pu RK Lianzuala ten hming an ziak a, MISMA Vice President R Lalnunpuia leh Zonet Cable TV Pvt.Ltd Manager LV Lalthantluanga ten he inremna hi an hriatpui thu an ziak bawk a ni.
JSL 1 ang bawkin JSL 2&3 hi International Level a ni leh dawn a, he event-ah hian bout 15 a awm dawn a, India ram chhung mai ni lo, India ram pawn atangin fighter tha tak tak an inlan leh dawn a ni. Tunlai infiamna thangduang tak MMA hi Mizo thalaite pawhin an ngaina tlang hle a, India ram chhung leh pawn thlenga eizawnna tham a nih avangin Zonet Cable TV Pvt.Ltd chuan he sport discipline hi a ngaipawimawh em em a, hei vang hian theih tawp chhuaha Mizo thalaite tana ke pen a tum leh ta a ni.
MISMA President Pu R Zosangliana chuan, "Zonet Cable TV Pvt. Ltd in thalaite hmakhua ngaihtuaha ke an pen leh ta hi kan lawm tak zet a, he infiamna rothap tak hi Mizo thalaite tana eizawnna tham a ni tih kan hria a, hetia Zonet Cable TV Pvt. Ltd nena thawhhona kan ziak ta hi ka lawm tak zet a ni. Tin, Pu Jerry-a leh Pu Joel-a te inpekna avanga he hun thleng thei hi kan ni a, an chungah MISMA aiawhin lawmthu ka sawi bawk a ni", tiin a sawi.
"UFC hi khawvela infiamna thangduang ber a ni mek a, Mizo thalaite pawhin kan ngaina tlang hle. MMA game scope hi a tha hle tih kan hria a, MISMA hian fighter tha tak tak SFL leh foreign thlengin an thawnchhuak tawh bawk a. Buaipui tlak infiamna a ni tih kan hriat avangin Zonet Cable TV Pvt.Ltd chuan thalaite tan ke kan pen chhuak leh ta a ni," tiin Zonet Cable TV Pvt. Ltd Managing Director Pu RK Lianzuala chuan thawhhona thuthlung an ziah zawhah a sawi bawk.