April ni 11, Thawhlehni zan khan Mizoram Super League Season 3 chu Hawla Indoor Stadium-ah khelh chhunzawm leh a ni a, Mission Veng Vikings chuan 81-60 in Champion lai Khatla TBL an sawp. American player Ronald March chuan vawi thum lai a dunk bakah Double double a nei nghe nghe a ni.
Mission Veng Vikings hian khelh tawhah hneh la nei lo mahse, Khatla TBL an hneh a, match thum khel tawhin point 4 an nei ve ta a ni. Khatla TBL hian match li khel tawhin point 6 an nei tawh a, match khat khelh hmabak la neiin April ni 27, Ningani zanah Tuikual South an hmachhawn ang a, hnehna an chan chuan semifinal ticket an nei ang.
Inkhel tan a ni a, Mission Veng Vikings chuan bul tan tha zawkin hmahruaitu zawkah an tang a, American player Ronald March chuan point 9-a score bakah a dunk nghal. Khatla TBL tan Vishesh Bhriguvanshi chuan beisei a pha lo. Coach cum player H Laldinsang (Mapuia) thawh hlawk mahse, midangin an thlawp that loh an tuar thung. Second quarter-ah Khatla TBL hmahruaitu zawk an ni thung a, H Laldinsanga'n point 8 score-in Gospel Lalthawmmawia'n point 6-a score ve bawk. Mission Veng Vikings hian turnover an ngah bakah an thawh hona that tawk loh an tuar a, Khatla TBL chuan 34-30 a hmahruaiin chawlh lawk an hmang ta a ni.
Third quarter-ah Mission Veng Vikings te in siam tha in, Ronald March leh Lalrina Renthlei chuan point 9 an score ve ve a, Michael F Lalawmpuia che a hmuhnawm hle. Quarter tir lamah Ronald March hian a dunk nawn leh bawk. Khatla TBL tan Chris Solomon leh H Laldinsanga (Mapuia) te langsar mahse, third quarter a zawh meuh chuan Mission Veng Vikings chuan 58-46 zetin hma an hruai tawh.
Quarter hnuhnung berah pawh Mission Veng Vikings an thawh hona a tha a, Ronald March chu a dunk leh bawk. Michael F Lalawmpuia a thawh hlawk hle a, point 11 zet score-in Ronald March hian point 7-a score ve bawk. Lalrina Renthlei leh Rikin Pethani ten an tawiawm tha hle bawk. Khatla TBL tan Garry Gill hian point 6 score-in a dunk ve bawk. Chris Solomon leh Vishesh Bhriguvanshi ten beisei an pha lo thung a, an thawh hona a tha tawk lo. Hun a tawp meuh chuan Mission Veng Vikings chuan 81-60 in hnehna an chang ta a ni.
Inkhel pumpui thlirin
Khatla TBL tan Garry Gill, Vishesh Bhriguvanshi leh Chris Solomon ten beisei an pha lo a, H Laldinsanga (Mapuia) chuan point 18 score-in Chris Solomon hian point 12-a score ve bawk. An thawh hona that tawk loh an tuar a tih theih awm e. Turnover an nghah a, rebound an la thei lo bawk. Champion nawn an tum chuan in siam thatna tur an nei.
Mission Veng Vikings khelh tawhah chak neilo mahse, Champion lai Khatla TBL an sawp thei a, semifinal khel turin theihna an nei tih an lan tir thung. American player Ronald March chuan vawi thum a dunk vangin a langsar hle a, mizo player Michael F Lalawmpuia, Lalrina Renthlei leh Moses Zorema an thawh hlawk bawk. An thawh hona that an chak pui kan ti thei bawk awm e.
(adsbygoogle = window.adsbygoogle || []).push({});