Tyson Fury chuan boxing ring chhunga amah hneh theitu apiang chu an keah a fawhsak tur thu a sawi.

Kum thum vel bawr a chawlh hnuah Fury hian boxing ring a luhchilh leh dawn a, Inrinni hian Manchester Arena-ah Albanian boxer kum 39-a upa Sefer Seferi a hmachhawn dawn a ni.

Fury hian a tum ber chu IBF, WBA leh WBO title kawltu Anthony Joshua hneh a ni a, heng title pathum hi a kawl bakah WBC title kawltu, American boxer Deontay Wilder hneh zui leh chu a duhthusam a ni.

“Inhneka min hneh thei an awm a nih phawt chuan ka thingthi ang a, min hnehtu ke pahnih chu ka fawp ang,” tiin Fury chuan a sawi a.

A sawi zelnaah, “Training ka ti nasa bawk a, tunah hi chuan ka inringtawk khawp mai a. Wilder emaw, Joshua emaw, Sefer Seferi emaw, tu pawh ni se, ka hneh lo a nih ngat chuan ka lo tha lo hle niah ka pawm ang a, boxing hi lo luhchilh loh tawp tur a ni ka ti mai ang,” a ti bawk.

Kum 29-a upa Gypsy King hian 25-0 record a nei mek a November 2015 khan Wladimir Klitschko chu hnehin world heavyweight title a laksak a. Hemi hnu deuh lawk hian depression vangin Fury hian a title kawl chu a kalsan a, boxing ring chhungah a lut leh ta lo a. Hei bakah hian damdawi hman phal loh a hman avanga kum hnih chhung hremna hmachhawn pawh a remti a ni.

Feet 6 leh inches 9 zeta sang boxer chuan boxing ring a luhchilh leh dawn tak avangin boxer ropuite chu a entawn nasat thu a sawi a. “Sugar Ray Leonard pawh kha kum nga hnuah a kir leh a, khatiang hun laia middleweight boxer tha bera sawi Marvelous Marvin Hagler chu a rawn hneh leh a ni,” a ti a.

“Kum thum pawh la tling loah ka rawn kir leh dawn a, tu mah ka hneh theih loh chuan boxer tha lo tak ka ni tihna a ni ang. Germany-ah khan Wladimir kha engtin nge ka ti dawn tih ka sawi lawk kha? Khatiang deuh bawk khan Joshua leh Wilder te ka hneh dawn ka tih chuan awlsam takin ka hneh leh mai ang. Joshua chu a tlipna atan a tawpah a zawnin left hook vawi ruk hmangin ka hnek ang,” a ti a ni.