A rihna a belhchhah vak a, a hlim lo a, damdawi hman phal loh laka fihlim loh vangin a chawl mek a, ui kai chunga khawlaia a kal pahin mi pakhatin a chanchin a sawi dan a ngaihtuah chhuak a, a harh chhuak ta chiah a. June 9 hian Manchester khawpuiah boxing ring chhungah kan hmuh leh theih phah dawn a ni.

Tyson Fury chuan amah ang bawka heavyweight boxer Deontay Wilder thu sawi chu a ngaihtuah chhuak a, a awm dan chu thlakin nun dan thara nun a tum phah a. Wilder chuan, “Tyson Fury chu a liam tawh, a hun a tawp tawh,” tiin a sawi a, hei hi Tyson chuan, “Hetia a sawi hnu hian ka ngaihtuah a, vawk thau tak ka ang ka ti ve bawk a, tuia zuan thlak a, tlakhlum daih te ka duh phah hial a ni,” a ti a.

“Mahni intihhlum lampangin ka rilru a luah zuai a, mahse ka inngaihtuah tha leh a, tuna ka awm dan hi ka bansan ang a, theihtawp chhuahin ka intuaihriam ang a, Deontay Wilder hi ka knock out dawn tiin ka inngaihtuah leh ta zawk a ni,” a ti bawk.

November 2015 khan boxing khawvel mak tih em em thil a thleng a, Tyson Fury hian heavyweight division lama ro lo rel rengtu Wladimir Klitschko chu a hneh a, hemi hnu hian Tyson hi a reh zui ta daih a, ruihtheih lampangah a tlan ta chiam a. Tunah chuan a nunphung a thlak a, boxing glove a bun leh tan dawn ta a ni.

Kum khat kalta khan kg 160 vel zet a ni hman a, tunah erawh pian pangngai tak a nei leh tawh a. Kum 29-a upa Fury chuan, “November 2015 khan ka hun laia heavyweight fighter tha ber ka ni a, Klitschko hnen atangin WBA, IBF leh WBO title ka laksak a. Kha kha ka tan chuan a tawpna a ni zui a, kum 2 leh a chanve hnuah ka kir leh thei hram a, kei ngei pawhin let leh theih hi ka inring tawh lo hial a ni,” a ti.

“Pub velah ka kal a, zu no 10 vel te ka in thin a, zu in pahin ka inngaihtuah a, boxing ring ka luhchilh leh nghal ang ka ti ziah a, mahse hetiang boruak tlansan ka duhna chu ka titawp thei mai lo a ni,” a ti.

Fury chuan Deontay chungchang sawiin, “Ka kut lehlam hi hnung lamah phuar bet ila, Wilder chu ka la hneh thei tho ang. Ka kut phuar tur hi an duh thlang nghe nghe se,” a ti a.

A sawi zelnaah, “Hetianga boxing khawvela ka rawn kir leh chhan chu midangte entawn theih nih ka duh vang a ni a. Mi tam tak chu keimah ang bawk khan rilru insual nasa deuhin an awm ve mek a, kei pawhin khati khawpa ka tlakchhiat hnua ngai ka awh leh theih chuan midang phei chuan an thei em em ang,” a ti bawk.

June ni 9 hian tu ber nge a hmachhawn dawn tih chu sawi chian a la awm chiah lo a, kum 39-a a upa cruiserweight Nuri Seferi chuan Twitter ah Fury nen hian inhnek tur angin a insawi a, mahse hei hi finfiah a la ni lo a ni.