Lalbiakliana Memorial Mizoram Football Association Super Cup quarterfinal inkhel thawh khatnaah Chhinga Veng FC leh Venghlui FC chuan semifinal an lut tawh a, July ni 20, Nilaini khan thawh hnihna khelh a ni a, Mizoram Police FC leh Chanmari West FC chuan an khingpui ve ve hnehin semifinal an lut ve ta a ni.

Semifinal hi July ni 21, Zirtawpah khelh tur a ni a, chawhnu dar 1:00 AM-ah Chhinga Veng FC leh Venghlui FC ten an khel ang a, chawhnu dar 3:30 PM-ah Mizoram Police FC leh Chanmari West FC ten an khel thung ang.

11:00 AM Aizawl FC Academy 1-4 Mizoram Police FC
(Lallawmawma 50'(p) (F Lalrinpuia 7', Lalchungnunga 13',OG, Lalruatpuia 69', Lalfakzuala 81')

Semifinal luh inchuh inkhel hmasa zawkah Mizoram Police FC chuan 4-1 a Aizawl FC Academy hnehin semifinal an lut ta a ni. Inkhel tan a tang a Minute 7-ah Mizoram Police FC tan Valpuia chuan free kick an hlawh chhuah atangin an hmahruaina goal a khung a, minute 6 aral leh hmain Biaktea ball vawr luh chu Aizawl FC Academy defender Lalchungnunga chuan an lamah a tauh lut hlauh; Aizawl FC Academy chuan an siphurh sut tumin nawr let mahse goal erawh an thun thei lo. Mizoram Police FC chuan 2-0 a hmahruaiin chawlh lawk an hmang ta a ni.

Second hlaf tan a ni a, minute 5 aral hmain penalty area-ah Mizoram Police FC defender Lalhmunmawia hand ball vangin Aizawl FC Academy chuan penalty an hlawh thung a, Lallawmawma chuan penalty chu petin goal-ah chantir  mahse, an siphurh an sut thei rih lo. Mizoram Police FC chuan an hun tha neih hmang tangkaiin minute 69-ah Lalruatpuia chuan an goal thumna a khung zui leh a, Aizawl FC Academy chuan an siphurh sut tumin counter attack-in nawr mahse goal an thun thei lo. Mizoram Police FC tan minute 81-ah Lalfakzuala chuan an goal li na khung leh in, Mizoram Police FC chuan 4-1 in hnehna an chang ta a ni.

01:00 PM Chanmari West FC 1-1 Dinthar FC

(Tlangthanpuia 63') (Lalnunpuia 48')
(Penalty shootout-ah Chanmari West 5-4 in an chak)

Inkhel hnuhnung zawk Chanmari West FC leh Dinthar FC te hun pangngaiah 1-1 a anin hneh tawk hnuah penalty shootout-in chak zawk zawn a ni a, Chanmari West FC chuan 5-4 in hnehna an chang ta a ni.

Goal lut te hi second half-a lut ve ve an ni a, second half tan a tang a minute 2-ah Dinthar FC chuan an chance neih hmang tangkai hmasa zawkin Lalnunpuia chuan goal hmahruai a khung a, Chanmari West FC chuan nawr let ve nghalin minute 63-ah freekick an hlawh chhuah Jacob Lalrawngbawla pet tha zet chu Tlangthanpuia chuan tauh lutin an siphurh an rul a, goal dang luh belh tawh lo in hun pangngaiah 1-1 in anin hneh tawk ta a ni. Penalty shootout-in chak zawk zawn a ni a, Chanmari West FC chuan 5-4 in hnehna an chang ta a ni.

July ni 21, Zirtawpni Semifinal Fixtures 
01:00 AM Chhinga Veng vs Venghlui FC
03:30 PM Mizoram Police FC vs Chanmari West FC