Hrangbana Memorial 2nd Mizoram Badminton League (MBL) chu November ni 11, Zirtawp zan khan Electric Veng YMA hall-ah final khelh a ni a, Tuikual Shuttlers chuan ankhingpui Mission Veng hnehin an champion ta a ni.
Final Tie khelh hma hian akharna huntawi hman a ni a, Pu Zorammuana, President, MBA chuan a kaihruai a, Guest of Honour Pu Ngunlianchunga, Minister of State chuan lawmthu sawina aneih zawhah; Chief Guest Pu Lalzirliana, Hon'ble Home Minister chuan mizo thlalaiten ruihhlo bakah taksa ti chhe thei kan ei nasat avang harsatna kan tawh thu a sawi a, MBA in Badminton League a buatsaih avang lawmawm a tih thu a sawi bawk.
Match hmasa berah Mens Doubles khelh niin Mission Veng tang Abhishek leh Manajit an rawn lut a,Tuikual lamin Neeraj leh Lalmama an rawn dah ve bawk.
Game tan a ni a, game an khel tha dun a, game-ah chungnung zawk an awm thei meuh lo. Point-ah pawh an inthlau lo hle a, game tawp lamah erawh Mission Veng lam game-a tha zawk thnung; point-ah hma hruaiin a tawp thlengin an chungnung a, game hmasa an la ta a ni.
Game khelh chhunzawm leh a ni a, point sang fal an awmlo an in lehthal zak zak hnuah match point leh game point nei tha zawk Tuikual lamin game an la ve thung.
Final game khelh a ni a, Tuikual lamin game tir lamah hmahruai mahse, point-ah erawh a in thlau lo thung; interval thlengin Tuikual lamin hmahruaitu nihna an chang a, Mission veng lamin rawn nawrin point-ah hmasa zawk nihna an chang mahse, Tuikual player Neeraj leh Lalmama an dang zo lo. Tuikual chuan hnehna an chang ta a ni.
Mixed Doubles khelh leh nghal a ni a, Mission Veng tan Hmingi leh Johny-a an lut a, Tuikual lamin Zuali leh game khel zo hlim Lalmama an rawn luh tir thung.
Game tantirh atangin Tuikual lamin hma an hruai nghal char char a, game-ah pawh chungnung zawkin, point-ah pawh an fal hle a, awlsam te in game an rawn la khatna an la ta a ni.
Game khelh chhunzawm a ni a, Tuikual lam chhungnung chhunzawm zelin, point ah pawh an sang zawk a, straight game- in Tuikual tan match point an hmuh belh leh ta a ni.
Mens Singles khelh leh a ni a, Tuikual lamin Tie hmasa a game khel tha tak Awpa an rawn dah a, Mission Veng lamin Abhishek an rawn dah ve thung a,
Hame khelh tirh atangin an in hnehtawk hle, Awpa game-a tha a, point-a, chutih laiin Abhishek game-ah chungnung zawkin game khatnaah 15-12 in Abhishek chuan a la ta a ni.
Game khelh chhunzawm a ni a, Abhishek- a chungchung zawk a, Awpa game in game hmasa a tluk lo thung; game tawp a nih thlengin Mission veng tan Abhishek-a chuan hnehna a chang ta a ni.
35+ Mens Doubles khelh leh a ni a, Mission Veng tan Rindika leh Albert-an rawn lut a, Tuikual tan Bma leh Biaknia an rawn lut thung;
Game tan a ni a, an innawr tawn zak zak hnuah Tuikual lamin point-ah hmahruaiin an game-a tha zawk a, game hmahruaitu zelin game khatna an la ta a ni.
Game hnihna khelh chhunzawm leh a ni a, Tuikual an chungnung chhunzawm a, Mission veng lamin rawn umpha thin mahse, point-ah chungnung zawk an ni thei lo, Tuikual lam game combination a tha a, an chakna hnar pawh a ni. 2nd MBL Champion nihna turin hnehna anchang ta a ni.
He Tie ropui takah hian Tuikual tana khel tha tak leh Point 2 hmu tu Lalduhawma chu Player of the Tie-ah tlan a nih bakah Player of the Tie atana vawihnih thlan nih bakah Player of the League-ah thlan a ni bawk.
Final Tie entu mipui an tam hle a, Hall chhung khat vekin mipui an pungkhawm a, Fans authawm pawh a ring hle a ni. Mission Veng lam Fans an fakawm a, an tumpui Tuikual Shuttlers te an chak chiah tihin Tuikual lam Theme Song an sakpui nghal kha aropuina ti zual tu a ni.
MBL hlawhltin nana mi inphal leh sum leh pai seng tute zawng zawng chungah MBL Ogranising chuan lawmthu sawiin, a ti hlawhtling tura Team dintute chungah lawmthu a sawi bawk.