Mizoram Basketball Association leh 39th Assam Rifles-ten an buatsaih Governor's Cup chu Decenber ni 9, 2016 (Zirtawpni) atang khan Hawla Indoor Stadium, Republic Vengthlang-ah khelh tan a ni a, ni hmasa berah Khatla TBL chuan 102-72 in Rajput Regiment, Uttar Pradesh an hneh nghal a ni.
MBBA Sr Vice President Dr Lalrinawma chuan Mizoram Governor chungah lawmthu sawiin, tournament buatsaih chhan ang ngeia hlawhtlinna an hmuh a beisei thu a sawi bawk.
Mizoam Governor Lt. Gen.Nirbhay Sharma chuan tournament a hawng a, Mizo mipuite nena inlaichinna tha siam thei tura Assam Rifles hmalakna a fak. Mizoram State Sports Council leh MBBA te nena thawhhona tha tak nei a, tournament an siam chu a lawmawm hle a ni, a ti.
Governor chuan Mizoram state leh a chhunga cheng mipuite chu hmundangte entawntlak hiala siam theih a ni tiin Mizo nunphunga thil tha lo - zuk leh hmuam leh ruihtheithil/ruihlo lam erawh kan bansan a ngai a ni, a ti bawk. Khawtlanga upa zawkten thalai leh naupang zawkte tana entawntlaka an nun a pawimawh a, taksa hrisel chuan rilru hrisel a siam thin a. Mizo infiammi engemawzat, a bik takin footballer-te chu ramchhung mai ni lo, ram pawn an thleng mek a, hei hian Mizo thalaiten talent an neih thatzia a tilang a, nunphung hrisel zawk kan zawm phawt chuan Mizote chu hnam hrisel leh hmasawn ber pawl an ni thei a ni, a ti a. Tournament-a tel tur team zawng zawngte duhsakna a hlan.
Governor's Cup 2016-ah hian inkhel hmasa berah Khatla TBL chuan 102-72 in Rajput Regiment, Uttar Pradesh an hneh a, quarter tir atanga a tawp thlengin hma an hruai tluan. TBL hian 1st quarter-ah 29-20 in hma an hruai a, 2nd quarter-ah point 28 thun belh lehin half time-ah 57-39 in hma an hruai hman. 3rd quarter-ah na zawka nawr lehin point 29 an hmuh belh a, Rajput lamin point 13 hmuin hun a tawp meuh chuan point 30 zetin TBL-in hnehna an chang.
Governor’s Cup Basketball Tournament-ah hian team 8 - Assam Rifles, Rajput Regimetn, Assam Regiment, Rajputana Rifles, Khatla TBL, Zarkawt Serpents, Tuikual South BC leh Mission Veng Vikings an tel a. Pakhatnain Trophy + Rs.50,000/-, Pahnihna -Trophy + Rs.30,000/- leh Pathumna - Trophy + Rs.20,000/- an dawng ang.
Governor’s Cup hi Dec.15, 2016 thleng awh tur a ni dawn a, December ni 10, 2016 (inrinni) chawhnu dar 1:0-ah Khatla TBL leh Zarkawt Serpents, tlai dar 3:00-ah Assam Rifles Aizawl leh Assam Regiment, Shillong, zan dar 7:00-ah Rajputana Rifles, Delhi leh Rajput Regiment, UP te an inkhel ang.
(adsbygoogle = window.adsbygoogle || []).push({});