Boxing leh MMA ngainatute mai ni lo khawvelin a nghahhlelh em em chu August ni 26 hian Las Vegas-ah khawvel hmuhin lantir a ni dawn a, MMA fighter Conor McGregor chuan boxing khawvela hnehloh la nei lo Floyd Mayweather Jr chu Boxing ring chhungah a hmachhawn dawn.

Las Vegas-a inhnek turah hian an glove hman tur rih zawng tih danglam a ni a, Nevada State Athletic Commission (NAC) chuan 10oz ațangin 8oz-ah an glove hman tur rih zawng hi an ti hniam.

UFC lightweight champion McGregor chuan, "Glove thar nen hi chuan round hnih thleng bak Mayweather hian a daih ka ring lo. Round 12 chhung inbei turin ka inpeih a second 10 chhunga hnekthlu turin ka inpeih bawk."

"Thiamna lantir phawta hneh duhna a awm a, mahse sawisak tuar thei chi niin ka hmu lo." tiin a sawi.

Junior-middleweight weight (154 pounds chin)-ah hi chuan glove hi 10oz a ni tur a ni a, mahse NAC hian hun khat atan chauh glove rih zawng hi tih danglam hi an remti.

Kum 29 mi McGregor hmachhawn tur Mayweather hian Instagram-ah 8oz glove hman hi a cho thu a tarlang a, a zam phah lo.

Kum 40 mi Mayweather chuan, "Media ho thusawi hi ring lo la, blog site lama i hriat pawh awih hek suh. Tlang taka keiman ka rawn sawi anih loh chuan thudik a nilo a ni mai."

"McGregor hnehah hian, '8oz glove-in in bei ang.' tih ka hrilh. A duh ang leh a thlan ang hmangin a khel thei a, 8oz glove hi ka bun ang."

"McGregor hian ring chhunga nuam a tih theihna tur ang a mamawh anih chuan ka pawmzam thei zel ang. Boxing leh MMA fan-te hi an duh ang i hmuhtir ang hmiang." tiin a tarlang.

McGregor hian MMA-ah kutzungțang tuam kim lo 4oz-a rit glove a hmang deuh ber a, Mayweather thung hi chuan vawi 49 a inhnek tawha vawi 46-ah 8oz-a rit glove hi a hmang tawh thung a ni.