Pellegrini-a'n Liverpool ui chung chung a chhuhsak, Etihad Stadium-ah erawh beisei a phak lo hle. Raheem Sterling hi a hunlaia English player manto kha a ni a, a man leh a khelhdan ngaihtuah chuan Manchester City transfer tihfuh loh ber pakhat nia ngai pawh an awm hman hial a nih kha.
City-in Pep Guardiola an la a, chutah Sterling a'n hrual ta tak tak mai chu, season hmasa chawhnu lamah phei kha chuan City fans ten Messi aiin kan duh zawk ti hial khawpin an fak a nih kha. Pep Guardiola chuan attacking football mawi takin a rawn khelhpui a, player naupang rual leh viak tha te a lim tir zuai zuai, tun season Premier League game 19 khel tawhin 55 points an hlawhchhuak tawh a, pahnihna United lakah point 13 laiin an fal mek.
Manchester City hi tun season Premier League-ah an la tlawm lo, game 18-ah hnehna an chang a, game khat erawh an draw hlauh. A zawnin vawi 17 lai an chak ta bawk a, Premier League record thar an siam chhunzawm zel. Kumin chhungin league goal 101 lai an khung tling tawh bawk, hei aia tam hi kumin chhungin an la khung dawn niin a lang.
Hetiang taka an rawn chetthat theihna chhan hi coach thluak a ni a, a player te a chhawr thiam bawk a, City hian hmatawng tha tak tak an nei, fak tlak vek an ni, chung zingah chuan tunlaia chetha fal chu kum 23 mi England international Raheem Sterling hi a ni. Season hmasa khan game 17 khelin goal 7 a khung a, tun season-ah erawh game 17 a khel tling chiah a, goal 12 lai a khung ta der mai. A inhliam emawte a nih ngawt loh chuan tun season-ah goal a la khung chhoh zel a rinawm a ni.
Inrinni zan khan Bournemouth an hmachhawn a, 4-0 laiin an sawp leh. Khami tum khan Aguero chuan goal hnih khungin Sterling leh Danilo ten goal khat ve ve an khung. Sterling hian Bournemouth lakah goal 9 teh meuh mai a khung tling ta der mai. Tun season competition hrang hrang atangin Sterling hian Etihad Stadium-ah goal 11 lai a khung tling tawh a, Sergio Aguero, Mohamed Salah, Romelu Lukaku, Alexandre Lacazette leh Wayne Rooney te aiin a chungnung tlat mai.
A zawnin home game-ah vawi 5 lai goal a khung a, Everton, Palace, Shakhtar, Stoke leh Napoli an hmachhawn tumin goal a khung vek. Manchester City hi tunah pahnihna Manchester United lakah point 13-in an fal mek a, English top-flight history-a Krismas laia hmahruaina zau ber record an siam ta a ni. Tin, Sterling hian conversion rate 35.3% lai a nei a, vawi thum goal attemp a neihah goal khat tal khung ang zel a ni.
Tun season La Liga-a Messi conversion rate chu 18.1% a ni a, Liverpool hitman Mohamed Salah rate chu 26.3% niin Harry Kane rate chu 20% a ni. 2015/16 season khan Sterling hian 11.3% conversion rate rate a nei a, 2016/17 season khan 16.7% rate neiin, tun season-ah erawh season chawhma chiah khelh a la ni chungin 35.3% rate a nei ta hem mai.