Sunday, April ni 15 a ni a. European League lian panga zinga pahnihah Champion thar pahnih kan hre thar.
Kar hmasaah Bayern chuan Bundesliga title an la fel a, tunkarah Premier League leh Ligue 1 champion kan hre leh ta.
(adsbygoogle = window.adsbygoogle || []).push({});
Manchester City chuan Wembley-ah Tottenham Hotspur 3-1 in an hneh a, anmahni hnaih ber tu Manchester United-in West Bromwich Albion 1-0 in an hnehloh bawk avangin Manchester City an champion.
Hemi hnu darkar khat lekah Paris Saint-Germain chuan anmahni hnaih ber tu leh champion lai Monaco 7-1 laiin an sawp a. Ligue 1 title an la ve bawk.
League pahnihah hian game 5 ve ve khelh tur a la awm a. An hneh dun pap pap ngei mai! Amaherawhchu tuinnge an league-ah ropui zawk? Kawng hrang hrang pali han en chhin teh ang.
1. Engtiang takin nge an champion?
Man City leh PSG te chu game 33 khelhah league champion an ni ve ve a, mak tak mai chu - City leh PSG te hian heng game 33 atang hian chak 33, draw 3 leh chakloh 2 ve ve an nei.
An title lak dan erawh chhete in a danglam hret a. Manchester City chuan TV-a inkhel en pahin an champion thu an hria! French club erawhin champion lai Monaco 7-1 a an hneh hnuah French lallukhum an khum thung.
Pahnihna lakah Manchester City hian point 16-in hma an hruai a, PSG hian pahnihna Monaco chu point 17-in an tlansan thung.
2. Attack
PSG leh Man City te hian an league ve ve ah goal an thun hnem ber ve ve.
Pep Guardiola naute hian goal 93 an thun a, game tina goal 2.81 thun ziah ang an ni. 7-1 a chak zo hlim PSG erawhin goal 102 an nei a, game tina goal 3.12 thun ziah ang an ni thung.
PSG hian Ligue1-a top scorer ni mek Edinson Cavani (25 goals) an kawl laiin Manchester City tana goal thun hnem ber Sergio Aguero (21 goals) erawh EPL top-scorers list-ah pathumna a ni thung.
French team hian an team atangin goal khung thei 16 an nei a, Manchester City hian goal khung thei 13 an nei ve mek.
Assist-ah Kevin De Bruyne-a'n assist 15 a nei a, PSG tana assist ngah ber Neymar chuan assist 13 a nei.
3. Defence
Sir Alex Ferguson-a'n 'Forward tha in Match a chakpui thin a, Defender tha erawhin League-ah a champion pui ang che' a tih thin kha kan la hria em?
City leh PSG te hian season tantirh atangin an goal an venghim tha.
Premier League-ah Manchester City hian goal 25 an chhuah tawh a, an game 33 atangin hian clean sheet 15 an nei - heng clean sheet te hi Ederson a ven vek an ni. Chutih rualin clean sheet chungchangah Ederson leh Man City te hi De Gea leh Man United-in khum a, clean sheet 16 an nei.
Ligue1-ah PSG hian goal 23 an chhuah a, clean sheet 16 an nei. Heng clean sheet te hi Areola (15) leh Trapp (1) te ven an ni.
PSG hian tun season-ah Man City aiin goal difference an nei tha zawk bawk a. Manchester City-in +68 an neih laiin PSG hian +80 an nei thung.
4. 'Rival' lakah enge an dinhmun?
Premier League-ah phat rual lohin Manchester City kawng a harsa zawk a - Manchester United, Liverpool, Tottenham, Chelsea leh Arsenal te an hmachhawn. PSG erawh Monaco tih loh chu Lyon, Marseille, Rennes leh Nice te an ni mai a. Manchester City kawng a hautak zawk tih a chiang.
Chutih rualin City hi an rival lakah hian an ropui hle a, Liverpool 4-3 leh kar hmasaa Manchester United 3-2 tih loh chu hnehloh an nei lo.