Mahuma Memorial Cricket Tournament chu November ni 14, 2016 khan Suaka Cricket Stadium-ah tan a ni a, match hmsa berah 1st Division kai thar team pahnih inhmachhawnin, Luangmual Cricket Club chuan run khatin Tlangnuam Cricket Club an hneh a ni.

Mahuma Memorial Cricket Tournament hi tournament dang ang lovin over 40 a khelh ni in, nikhat ah match khat zel a awm dawn a, November ni 15, 2016 hian Chanmari Cricket Club leh Ramhlun Venglai Cricket Club-te an inhmachhawn ang.

Tournament tan niah hian 2nd Division atanga 1st Division-a kumina rawn kai thar Luangmual Cricket Club leh Tlangnuam Cricket Club te an inkhel a, Tlangnuam CC te toss-ah chak zawkin vuak hmasak an thlang a, over 40 inkhelh a ni tih hria in Tlangnuam opener ten hmanhmawh lo takin fimkhur takin bul an tan.

Jeremy Lalhruaitluanga chuan ball 38 ah run 12 siamin a opening partner Andrew Lalhmachhuana chuan ball 40 atangin run 20 a vaw chhuak bawk a, an opener te an out hnu hian batsmen dang double figure kai pakhatmah an awm tak loh avangin Tlangnuam CC te hi over 30.5 ah run 86 siamin an out zo vek a ni.

Luangmual CC bowler zingah Lalrinchhana chuan a vawm tha fal hle a, over 8 a vawmah run 10 pein wicket 3 a la a, maiden vawi 3 lai a nei bawk a, Lalrinchhana thlawp tur hian H. Lalhlimpuia 25/3 chu a vawm tha hle bawk a ni.

Ball 240-a run 87 siam hi harsa lo tak nia a lan laiin Luangmual lam opener Lalruatsaka chu run siam lovin a out bakah 1st Down-a lut James Lalrinzuala chu run 3 lek siama a out lehnghal avangin Tlangnuam te an phur chho viau.

Mahse Thakur chuan run 17 a rawn vaw chhuak ve leh zet a, opener Zaithanmawia (11 runs) a out hnu phei chuan an inhneh tawk hle a, tu zawk nge chak ang tih a hrait lawk loh, inhnehtawk taka an inkhelh laiin a tawpah Luangmual CC te vannei zawkah tangin wicket khat in an chak ta hram a ni. Tlangnuam CC bowler Jeremy Lalhruaitluanga chuan run 32 pein wicket 4 a la a, Laldinthara chuan run 10 chauh pein wicket 3 a la ve bawk a ni.