Mizorama cricket inelna sang ber Mahuma Memorial First Division Tournament chu Zirtawpni Ni. 15.12.2017 atang hian Suaka Cricket Ground, Sihhmuiah khelh a ni dawn.

Semifinal pakhatna:

Naktuk ah league hmahruaitu Chanmarians Cricket Club leh palina Ramhlun Venglai Cricket Club-te an inhmachhawn ang a,

Semifinal pahnihna: Inrinnia khelh turah league-a pahnihna Kulikawn Cricket Club leh pathumna Chhinga Veng Cricket Club-te an inhmachhawn thung ang.

League hmahruaitu Chanmarians hian league inkhelah hneh loh an tawng miah lo a, league-a pathumna Chhinga Veng nena an inkhelh tumin khawchhia vanga inkhelh chhunzawm theih loh hnua point khat ve ve an insem tih loh chu an khingpuite an hneh vek. Pahnihna Kulikawn hi Chanmarians chiah hneh loh neiin anni pawh khaw chhiat vangin game khat an khel thei lo ve bawk. Pathumna Chhinga Veng hi an vanduai a, Kulikawn chiah hneh loh nei mahse khawchhiat vangin match hnih ngawt an khel thei lo a, hei hian league-a an dinhmun pawh khawihin pathumnaah an awm phah. Palina Ramhlun Venglai erawh tun season first division league-a an match khelh tur khel kim thei awm chhun an ni a, an chunga awm team pathumte league-ah hneh lo vek mahse an hnuaia mite zawng zawng an hneh avangin vawi li chak leh vawi thum chak loh neiin semifinal an lut thung.

Semifinal game pahnih hi a nih dan tur ang thlapa rem lawk emaw tih mai tur a ni. Semifinal 1-a inhmachhawn tur Chanmarians leh Ramhlun Venglai-te hi tun season-a slow bowler nei tha ber pahniha chhal ngam an ni a, tunge ding chang zawk dawn erawh sawi thiam a har hle. Semifinal 2-a inhmachhawn tur Kulikawn leh Chhinga Veng-te erawh pace bowler nei tha ber pahniha chhal ngam an nih bakah team balance tha bera ngaih theih an ni bawk.

Semifinal 1

Chanmarians vs Ramhlun Venglai

Mizorama cricket club hlun berte zinga mi pahnih Chanmarians leh Ramhlun Venglai inkhel tur hi a hmuhnawm hle tura ngaih a ni. League match hnuhnung berah hemite pahnih hi an insu zo chiah a, Chanmarians hi chak zawk mahse an chak danah inchhuang thei bik an awm lo a, run ruk (6) chiahin an chak hram.

Chanmarians hi tun hma atangin batting lineup nei tha em em mai team an ni a, tun season-ah pawh hei bawk hi an innghahna leh an hmachhuan ber tur pawh a ni. Hei bakah hian Mizorama cricketer senior eng emaw zah an kawl a, heng mite hi an inghahna an ni leh ngeiin a rinawm a, hetihlai hian naupang duhawm tak tak an kawl tel bawk. Ramhlun Venglai erawh an player-te an naupang tlang seng sawng hle. An academy atanga chhuak deuh vek chhawrin tun dinhmun hi an thleng thei a ni. Tun tournamnent-a Ramhlun Venglai chakpuitu chu an slow bowler-te an ni deuh ber. Ramhlun Venglai khelh ni ah chuan inkhel sawi lawk hleihtheih a ni ngai lo a, Mizorama team tha ber pawh tum se an ngaihtuahawm an nih bik loh rualin league match-a an hneh lohte vek awmna semifinal-ah hian team huphurhawm ber chu an ni lo mai thei.

Chanmarians hi an opening batsman, tun tournament-a inkhel vawikhata run tam ber (run 122) siamtu Lalhmangaiha chu an innghahna ban pawimawh tak a ni leh ngei ang. Ani bakah hian a opening partner Lalhruaizela pawh en kan thiang a ni bik lo. Bowling lamah an khingpui tur Ramhlun Venglai ang bawkin an spinner-te an innghahna an ni leh ang. State pawn atanga an allrounder chah luh Debojyoti Jun pawhin tun tournament-ah run 175 lai a thawk chhuak tawh a, bowling lamah pawh an bowling lineup tihausa tu pawimawh tak a ni. Anni bakah hian an captain, inhliam vanga league match tam zawk khel thei lo K. Lalremruata inkhel leh thei tawh tur hian nasa takin phurna a pe ngei ang.

Hetihlai hian an khingpui tur Ramhlun Venglai hi tun season-ah an batsman-te'n beisei an la pha meuh lo. An batsman che tha ber an captain Malsawmdinpuia pawh tun tournament-a run siam tam lamah 13-na a ni pha tawk a, Chanmarians lakah pawh hian Dinpuia chet that leh that lohah an innghat thui khawp ang. Tun tournament-a an hlauhawmna ber chu an bowling-ah a ni thung, an spinner-te'n Ramhlun Venglai hi tun dinhmun hi an hruaithleng a tih theih a, an bowler zingah Joseph Lalthankhuma, Remruatdika Ralte leh Robert Lalfamkima-te an langsar hle. Joseph-a hian tun tournament match ruk a khelh tawhah wicket 14 ngawt a la tawh a, an khingpui batsman tha leh rinrawlte vawm out-tu pawimawh tak a ni. Anni bakah hian sawi hmaih theih loh chu state pawn atanga an player chah luh, vawm na tak Dibakar a ni a, an innghana player pawimawh tak a ni leh ngei ang.

Semifinal 2

Kulikawn vs Chhinga Veng

Inrinni zing dar 9:30-a inkhel tur team pahnihte hi tun hnai Mizoram cricket inelnaa stage sanga inhmachhawn zing berte zinga mi an ni. Tun tournament league inkhelah an lo inhmachhawn tawh a, Kulikawn hian run 156 siamin Chhinga Veng hi run 139-ah an vawm out veka run 17 in an chak. He inkhelah hian Chhinga Veng hian an player hlui C. Lalrinsanga (run 65) an ngam lo.

Kulikawn leh Chhinga Vengte hi tun tournament-a team balance dik ber pahniha ngaih theih an ni. Bowling lamah spin bowling aiin an pace bowler-te an innghahna pawimawh an ni leh ngei ang. Batting lamah chuan he team pahnih hi an batsman tawp berte thlenga an team-te chak pui thei ve ve an nih avangin sawi lawk thiam a har hle.

Kulikawn hi tun tournament-a game ruka wicket 20 ngawt la thei, an pace bowler H. Zothanchhunga hoin an bowling a hlauhawm leh hle tura ngaih a ni. Kulikawn hian tun tournament-ah bowler 11 an chhawr tawh a, heng bowler-te wicket lak zat belhkhawm hi 49 a ni. Chhungtea wicket 20 lak tel lo hian Kulikawn bowler 10-te'n wicket 29 an la ve thung tihna a ni. Chhinga Veng nen an inhmachhawnna turah pawh hian Chhungtea hi a pawimawh leh hle ang. Hetihlai hian batting lamah tun tournament run siam tam lama pasarihnaa awm an vice captain C. Lalrinsanga chu an rin rawl a ni leh ang. Kulikawn hian state pawn player pahnih an nei a, inkhel vawikhata pakhat chiah a chhawr theih avangin semifinal-ah hian tunge an rin zawk dawn tih sawi thiam a har hle.

Veng Inlungrual leh Sports ngaina tak hmasawn tum Chhinga Veng te hi eng Team tan pawh a huphurhawm leh tum chakawm loh an ni a, Inter State Player Century vaw chhuak thei bakah Khawilam hawi pawh a Ball vaw chhuak thei Batsmen tha an kawl nawk a, Mizoram Player Senior tha ho awmkhawmna emaw tih mai tur an ni a, an Inter State player te tello pawn Champion Squad an nei thova, Opening Batsmen tur ringawt pawh Fight ngai khawp squad an neih avangin leh Tournament kallaia an khelh that tulh2 avangin Team dang tan Chanchin ngainawm tak a nilo. Bowling lamah Pace Attack an that tawkloh niah Slow Bowler Wicket la thei tak2 an nei bakah an Fielding tha hi midang aia an chungnunna a ni. Tournament tir lamah Beisei pha zanlo mahse League Match a tawp meuh chuan Team hlauhawmber leh Huphurhawmber an rawn ni chho thei a ni.