President's Cup 2017 Champions Kulikawn CC chu Mahuma Memorial Cricket Tournament-ah an chak chhunzawm zat mai. November ni 11, 2017 khan Suaka Memorual Cricket Ground, Sihhmuiah Kulikawn CC chuan run 18-in Chhinga Veng CC an hneh a, bul tha takin an tan nghal a ni.

Mahuma Memorial Cricket Tournament-ah hian Overs 40 khelh a ni a, Toss-a chak zawk Kulikawn CC ten vuak hmasak thlangin wicket hloh vat lo mahse pitch thar an hman avangin run an siam tam hleithei lo. Opening batsmen H. Zothanchhunga a out hnuah a khat mawi tawkin Kulikawn lamin wicket 3 an hloh a, 3C te an phur vanglai takin Kulikawn CC Captain Michael Lalremkima lo lutin run 30 a rawn siam tlat mai.

Kulikawn tana vaw chhuak hnember C. Lalrinsanga chuan run 65 zet a rawn vuak chhuah zarah Kulikawn te hian over 40 ah wicket 9 hlohin run 157 an tlin hram a ni, 3C bowler zingah Lalhruaimawia Ralte vawm tha berin over 8 a vawm atangin run 32 pein wicket 3 a la a ni.

Chhinga Veng CC tan ball 240 ah run 158 hi um huphurhawm angin lang lo mahse Pitch thar an hman avangin Batsmen ten harsatna an tawk tih Kulikawn Innings atanga a hriat theih. 3C ten an Inter-State player Saidul chu ball 4 chauh a hmachhawn hman tihin run siam lovin a out ta mai a, mahse Batsmen experience nei tha Abhay Joshi (43 Runs) leh K. Vanlalruata (22 Runs) ten theihtawp rawn chhuahin an target an umpha hman thelh.

Hetih lai hian Chhinga Veng lamin Kulikawn all rounder H. Zothanchhunga an ngam ta tlat lo mai, ani hian over 8 ah run 21 pein wicket 4 zet a la a, Kulikawn ten Mahuma Memorial Cricket Tournament 2017 an khelh hmasakberah run 18 in Chhinga Veng te an hneh ta a ni.

13th Nov 2017 fixture :

Tlangnuam CC vs Gorkha CC

Suaka Memorial Cricket Ground, SIHHMUI (9:30AM)