12 Dec 2016 07:17

Inkhel

Mizo Sports Website hmasa ber

​Lords an harhchhuak tlai? Luangmual an relegate?

Suaka Cricket Ground-a Mahuma Memorial Tournament round 7 match hmasaberah Zarkawt Lords chuan an khingpui Luangmual chu run 126-in an hneh. He inkhel result avang hian Lords chuan semifinal luh beiseina tlem an la neih phah a, Luangmual hi table-ah parukna ni mahse an relegate leh relegate loh chu inkhel dang result-ah a innghat tawh.

Round 7 tan hmain kan thlir lawk tawh a, team tinte mamawh kan hria. Lords leh Luangmual hi chak ngei ngei mamawh team an ni a, an chak a nih pawhin a hneh thei ang bera an chak a tul.

Inkhel chu

Toss-a vannei Luangmual-in an that zawkna hriain vawm hmasak an thlang. Hetihlai hian Lords pawhin hmanhmawh taka a tam thei ang ber runs siam an mamawh tih hriain state pawn atanga an chah luh Zahir Uddin leh vice captain Jonathan Lalrinchhana-te bat turin an thun lut ve bawk. Lords hian bul an tan tha chho viau dawnin a lang a, mahse uihawm takin an vice captain Jonah hi run 32 chiah an siam tihin an hloh. Hemi hnu hi chu 'Zahir-a Show' a ni ber tawh. Luangmual bowler-te'n Zahir-a vawm out hleithei an awm lo a, Zahir hian ball 110 a hmachhawnah run 105 vaw chhuakin tun tournament-a century siam thei pahnihna a ni. Lords tan hian an captain Michael Lalchhuanawma chuan Zahir hi a thlawp tha hle a, ball 54 a hmachhawnah run 34 a vaw chhuak ve bawk. Over 40 a zawhin Lords hian wicket 7 hlohin rum 237 ngawt an vaw chhuak.

Luangmualin him chiang tur chuan chak ngei ngei an mamawh ve tho tih an hria a, target sang tak an um dawn avangin muan sual hlauin an batsman neih that ang ang an rawn theh chhuak nghal. Mahse run 38 chiah an siamin an opening batsman pahnih an out fel der tawh! An hnung chiaha lut Raj Kumar Thakur chuan rang takin ball 42-ah run 45 a rawn vaw chhuak a, hei hian an dinhmun a siam tha chho hret dawna a lan laiin thlawp tu a nei lo. Lords tan an pace bowler Lalmawizuala (over 7; run 30; wicket 3) leh batting lama thawh hlawk an captain Michael Lalchhuanawma (over 7; run 28; wicket 3)-te'n an vawm tha a, Luangmual hi run 111-ah vawm out vekin awlsam takin an chak.

Mahse...

Lords hi awlsam takin an chak a, run 126 laia inhneh hi chak awlsam ti a sawi loh theih a ni lo. Mahse hei hian an tum ram semifinal a hruai thleng angem? tih erawh zawhna lian tak a awm mek. Heti hian an chunga team pathum point riat hmu huangah an rawn inhlangkai ve ta a, an net run rate erawh a hniam ber thung. Lords hian an league match hmasaberah champion lai Kulikawn an hneh a, an match hnihnaah chak ngei tura ngaih an nih laiin kai thar Tlangnuam an hneh lo a, hei hi tun thlengin an la tuar chho zel niin a lang.

Vawiin hian table-a pathumna leh palina Kulikawn Cricket Club leh Ramhlun Venglai Cricket Club-te an inhmachhawn dawn. He inkhel result hian table hmel hmang hi a sawi danglam dawrh thei a, engmah danglamna a thlen lo ve thei bawk. Lords hian a lan danah chuan NRR-ah RVL bak lehpelh theih an nei tawh loin a lang a, mahse Kulikawn-in RVL hi an sawp ve deuhhlek a nih loh chuan NRR-ah Lords tan RVL lehpelh a theih tawh loh. Hetihlai hian RVL an chak chuan table-ah pahnihnaah an invawrh chho ang a, Kulikawn hi palinaah an tla thung ang.

Luangmual hian Nilaini a inkhel result an ngaihchan a ngai thung. Heti hian him thei an ni tawh a, mahse Nilaini inkhel result hi an tana tha zawnga a her chhuah loh chuan an relegate thei bawk. Nilaini khian vawikhat chak nei Tlangnuam CC leh la chak lo vek Chaltlang SC an inkhel dawn. Tlangnuam hi an chak chuan Luangmual aia an NRR a that tawh sa avangin 1st division-ah an la inham tang dawn a, hetihlai hian Chaltlang hian chak loh nei miah loa league hman tluan thak duh loin Tlangnuam hi 2nd division lamah an hnuk tla lui ve thei tho!