Liverpool-a a khelh laiin European Footballer of the Year atana thlan a ni, Liverpool legend tia koh theih tur khawpa player tha leh ropui a ni. Hetih lai hian BT Sport tana thawk mek Michael Owen-a tawngkam chuan Liverpool fans a ti lawm lo kher mai.

Nikum khan Owen hi Liverpool International Ambassador atana ruat a ni a, Reds tana a khelh laiin game 297 atangin goal 158 lai a khung. Real Madrid a pan hnuah Manchester United-ah a football hun a thlahliam.

Kum 2001 FA Cup final-ah si hnih faiin Liverpool chuan hnehna an chang a, kha match ah khan Michael Owen chuan Liverpool tan goal hnih khungin trophy an chawi. Liverpool player langsar ber pakhat hi kop-te chuan an ngaisang reng, mahse nilaini zan Europa League final-ah erawh a tawngkam avangin a mi tam tak a hloh tlat mai le.

Stockholm-a Europa League final-ah Manchester United leh Ajax an inhmachhawn. BT Sport tana thawk football pundit Michael Owen chuan; United-in goal an khung hnuin, "Goal dang khung kan la mawmawh," tiin a sawi.

"Kan" tih tawngkam a hmang hian Liverpool supporter te thin a khei zak a. Liverpool leh Manchester United inhuat zia pawh kan hria, Liverpool ambassador-in hetianga United tan lama tawngkam a nei hi lawm lovin Liverpool supporter te chuan Liverpool Football Club International Ambassador a nihna atanga Michael Owen paih thla turin petition an siam nghal.

Darkar 12 chhungin online petition-ah hian mi 8,000 chuan hming an ziak tawh a. "Michael Owen hian Liverpool International Ambassador a nihna hi a zah lo a ni. Chuvang chuan a nihna atang hian rang taka chawlh tir a tha a ni. Tin, hemi dinhmuna hlangkaitu pawh hi a inngaihtuahnawn a ngai a ni," tiin an tarlang bawk.