Mizoram Football Association buatsaih LG Independence Cup final, August 15, 2018 a khelh turah LG Electronics India hotupa ber, Managing Director Mr Ki Wan Kim a lo kal dawn.
LG hotupa hmuah dan tur leh thil ṭul dangte ngaihtuahin vawiin (August 11) khan MFA Executive Committee chu an ṭhu khawm a ni.
MFA chuan LG Independence Cup final en turin mi zawng zawng a sawm a, August 15 chawhnu dar 2:00-ah hmeichhe final-ah Pachhunga University College leh Maubawk High School an intum ang a, tlai dár 4:00-ah mipa final-ah Aizawl FC leh Chhinga Veng FC te an intum ang.
MFA thurel dangte:
1. MFA chuan National Sub Junior Football Championship North East Zone Qualifier chu August 20, 2018 aṭang hian Kolasib ah a thleng dâwn. Hemi atan hian inbuatsaihna chak taka kalpui mêk a ni a, Organising Committee leh Kolasib District Football Association lamin a ṭul apiangah hma an la chho zel a, Mizoram team pawhin residential camp an nei mek.
2. National Junior Girls Championship, Goa-a August 20-31 chhunga neih tura Mizoram team inbuatsaihna chu an zo thawkhat tawh a, August 13 hian Aizawl an chhuahsan ang. Mizoram team hi Coach Laltuakliana leh Manager J Laltuanpuii ten an hruai ang.
MFA in Assam Rifles hotupa chawimawi
Mizoram Football Association chuan Brig MS Mokha, Commander 23 Sector Assam Rifles chu Mizorama a awm hun chhung a tawp hnaih tâk avangin August 11 zana LG Independence Cup inkhelh hmain thlahna leh chawimawina hun a buatsaih.
Brig MS Mokha kaihhruaina hnuaiah hian Mizoram pum huap football inelna chu Assam Rifles leh MFA ṭangkawpin an buatsaih a, Assam Rifles football team ṭhate a chah chhuak a, hei bakah hian Mizo footballer te sipaia an ṭan dan tur a ngaihtuahsak bakah kawng engkima MFA ṭhian ṭha a ni.
(adsbygoogle = window.adsbygoogle || []).push({});