Naktuk hian Formula 1 2018 season bul tan a ni leh tawh dawn a, intlansiak hmasa ber chu Australian Grand Prix niin, vawiinah qualifying an tlan zo a, champion lai Lewis Hamilton chuan a lallukhum hum him ngei tumin tan a la a, naktukah a tlan hmasa ber dawn.

Mercedes driver Hamilton hian Melbourne Park-ah harsatna a nei lem lo hle a, helai hmun bikah hian pole position hi vawi 7 a channa chiah niin, Formula 1 khawvel a luhchilh hnua a vawi 73-na a ni bawk.

Lewis Hamilton hnung chiahah Ferrari driver Kimi Raikkonen a awm ang a, Sebastian Vettel chu pathumna niin, Max Verstappen chu palinaah a tlan bawk ang a. British driver Hamilton-a team-mate Valtteri Bottas erawh a chesual a, a tlan tluanchhuak ve ta lo.

Vawi 5 champion tum mek Hamilton chuan pole position a chang thei chu lawmawm a tih thu a sawi a. Hamilton hian tluk loh pahnih chiah a nei a, vawi 7 champion thei Michael Schumacher leh vawi 5 champion thei Manuel Fangio te an ni a. He track-ah hian pole position a chan hnuah, 2008 leh 2015 te khan Hamilton hi chak ber a lo ni tawh a ni.

Nikum khan Lewis Hamilton hian pole position a chang a, pahnihna niin, second 10 velin Sebastian Vettel a thleng hmasa zawk a ni.

Melbourne Grand Prix Circuit-ah hian 1996 atang khan Australian GP hi nghah tan a ni a. A track sei zawng hi 5.303 km niin driver te hi lap 58 an tlan dawn a, a belhkhawmin 307.574 km a ni.