Nikum tun ang hunah kha chuan relegation zone atangin point 7-in an him, an lawm hle a nih kha. Kuminah erawh pahnihna Tottenham lakah point 7 laiin an fal, Premier league champion an ni ta.
Leicester City zin kawng hi a ngaihnawm a, khawvel an barakhaih chiang hle. Team thawhhona avang liau liauva champion an ni. Hetih lai hian team-a tangkai zual bik erawh an awm chiang mai. Mahrez leh Vardy te chuan team tan an thawhhlawk hle a, Mahrez chu PFA player of the year atana thlan a ni a, Football Writers' Association Footballer of the Year-ah Vardy thlan a ni bawk. An phu dun hle.
Khawvela footballer tha ber an thlan pawh hian hmatawng lam buk a rit ziah, media lamah Vardy leh Mahrez-te hming a ri ngun a nih pawhin a mak hran love. Tin, Kante pawh hi Foxes tana player tangkai ber pakhat a ni, anni pathum hming hi kan lam ngun hle, anni pathum ni lo, Leicester City innghahna player dang sawi hmaih thiang lo an awm nual, chungte chu tarlang ila.
Robert Huth
Club khelh tawhna : Chelsea, Middlesbrough, Stoke
Transfer fee : £3m from Stoke City on June 24, 2015
Stoke tan game 143 lai a khelh hnuah February 2015 Transfer window deadline day khan Leicester City khan loan-in an lalut a, a hnuah a ngheta contract an ziahpui leh a, Foxes an ti fuh khawp mai.
Tun season-a centre-back che tha ber pawl a ni mek a, game khelh chhiat chang nei mang lovin tun season-ah League-ah bik game khat chiah a khel lo a ni.
Kum 31-a upa Huth hian tun season-ah block, clearance leh ball tauh chhuah nei hnemah te Premier League-ah Top 10 ah a hming a lang mek.
Marc Albrighton
Club lo khelh tawhna te: Aston Villa, Wigan (loan)
Transfer fee: Undisclosed fee (puanzar loh) from Aston Villa on May 23, 2014
Albrighton hi Aston Villa academy chhul chhuak niin manager hrang hrang an nei chho bawk nen senior team-ah hmun nghet a chang chho hleithei lova, season hmasa tir lamah khan Leicester hian Albrighton hi lakluh theihna hun tha neiin an lalut ta a ni.
Leicester City manager Ranieri hnuaiah rawn parvul chhuakin kum 26-a upa Albrighton hi midfield vei lamah a tlan tir a, tun season Premier League-a goal thun theihna chance siam hnem top 10-ah a lang mek a ni.
Danny Drinkwater
Club lo khelh tawhna te: Manchester United, Huddersfield (loan), Cardiff City (loan), Watford (loan), Barnsley (loan)
Transfer fee: Undisclosed fee from Manchester United on January 20, 2012
Kum 25-a upa Drinkwater hi Manchester United midfielder hlui niin Manchester United-a a awm lai khan club hrang hrangah loan-in a chhuak kual a, January 20, 2012 khan Leicester hian an lalut ta a ni.
Drinkwater hian tun season-ah game tin tackle 2.83 nei ziah ang niin ball a pass zawng zawng zinga 78% chuan a kalna tur hmun a thleng dik chat chat vek a, game tin key passes 1.4 nei ziah ang a ni bawk. Leicester City counter attack neih nan player tangkai ber pakhat a ni.
Leicester City manager Ranieri pawhin Drinkwater hi a rin ai daiha player tha a nih thu sawiin game khel tura a tih ang chiah chiahin a khelh chhuah thin thu a sawi a, a player pawimawh tak a nih thu a sawi bawk a ni.
Wes Morgan
Club lo khelh tawhna te: Nottingham Forest, Kidderminster Harriers (loan)
Transfer fee: Undisclosed fee from Nottingham Forest on January 30, 2012
Wes Morgan hi Nottingham Forest player rinawm niin kum 2012 thleng khan Nottingham Forest tan a khel a, Forest tan a khelh chhung khan tum thum lai Player of the Year-ah thlan niin Football League lama team of the decade thlan zingah a hming pawh a lang ve bawk a ni.
Tum thum lai Nottingham Forest Premier League kaina tur pay-off a paltlangpui zawhloh hnuin Leicester City a zawm ta a, Leicester City hi Premier League lamah kaipuiin kum 30 a tlin hnuah chauh Premier League a khel chho ve tan ta a ni.
Robert Huth nen Leicester defence mawng an ti phui hneh thin hle a, tun season-ah pawh block nei hnember zing ami niin Premier League-a mi shot tur lo block nei hnem zingah palinaah a awm mek a ni.
Leicester manager hlui Nigel Pearson khan Morgan a pawimawhzia hi sawiin team leader nih tlin tak, player naupang zawkte enkawl thiam tak leh a tha zawnga fuih thiam tak a ni a, hotu nih tlin em em a ni tiin a fak a ni.
Danny Simpson
Club khelh tawhna te: Manchester United, Royal Antwerp (loan), Sunderland (loan), Ipswich (loan), Blackburn (loan), Newcastle, QPR
Transfer fee: Undisclosed fee from QPR on August 30, 2014
Drinkwater ang bawkin Simpson hi Manchester United academy chhulchhuak a ni a, player naupang hma lam eng taka ngaih a nih thin laiin United senior team tan khan game 3 chiah a inlan.
Loan-in club hrang hranga a tal kual hnuah kum 2010 khan Newcastle-in an lei ta a, Newcastle-ah kum 3 awmin QPR lama a kal leh hnuah Leicester hian an lalut ta a ni.
Season tir lamah Leicester tan bul tan thei lo mahse September atang khan Leicester right-back rinrawl ber a rawn ni chho a, game 20 lai a khel tling leh der tawh a ni.