Lewis Hamilton chuan kumin ang em em a Formula 1 title lak chak hi a la neih loh thu a sawi.
British driver Hamilton hi Formula 1 driver champion lai mek a ni a, a title kawl mek chu humhim ngei a duh a, F1 title vawi 5 lak theih a tum hle. Hamilton hi tun season-ah a champion a nih chuan Formula 1 champion hnem lamah pahnihna a ni thei dawn a, Juan Manuel Fangio a nihrual ang a, vawi 5 ve ve an champion thei dawn a. German driver ropui Michael Schumacher chu vawi 7 champion tawhin, F1 driver champion hnem ber a ni.
Kum 33-a upa Lewis Hamilton hi tun season-ah drivers’ championship-ah pahnihna a ni mek a, Ferrari driver Sebastian Vettel chu pakhatna niin, Vettel ai hian Hamilton hi point 1 chauhin a hniam a, um phak a huphurhawm lo hle.
Hamilton chuan, “Thil tam tak min nawr kaltu an awm a, tum dang zawng aiin kumin hian champion hi ka chak lehzual a ni,” a ti.
A sawi zelnaah, “Ka nun kal zelah thil chi hrang hrang ka ti thin a, ka la ti zel bawk a. Heng ka thil tih hrang hrangah hin duh deuh deuh leh ngainat deuh deuh ka nei teuh a, mahse heng zawng zawng hi intlansiak hian a hliahkhuh vek a. Intlansiak tel lo chuan thil dang zawng zawng hi engmah an ni lo ang,” a ti bawk.
“Ka chhungrilah hian intlansiak hian hmun a luah nghet hle a, thil dang zawng zawng chu a khum vek a. Tun dinhmun ka thlen theihna atan hian hun tam tak, inpekna nasa tak a kal ral tawh a, tuna ka thil tih lai hi nuam ka ti ber a. Kan intihsiakna leh chona kan hmachhawn hi ngainat loh a har a ni,” tiin Hamilton chuan a sawi.
Kumina vawi 7 intlansiak tawhah Hamilton hi Vettel nen an inchak chhawk a ni ber a, Red Bull driver Daniel Ricciardo pawh tum hnih chu podium-ah a lawn ve tawh bawk a. Hamilton chuan title inchuhnaah amah leh Vettel bakah Ricciardo te chu a chungnung ber turte an nih a rin thu sawiin, hetianga pakhatna nih inchuh hi nuam a tih thu a sawi a ni.
“Ka pain ka thil tih reng rengah tlawm a phal lo a, beidawn a phal ngai lo a. He thurawn hi ho deuh angin lang mahse ka tan a tha em em a, ka tangkaipui hle a. Sawi ang ngawt hi a takah chuan a ni lo hle a ni,” tiin Hamilton hian a sawi.