Mapuia Cricket League final-a intum turte a hriat ta a, Inrinni khan Eliminator 2 khelh a ni a, Chhinga Veng Cricket CLub(3C) chuan run 16-in Kulikawn Cricket Club an hneh a ni. Thawtannia final khelh turah Chhinga Veng hian Qualifier-a an hneh loh Chanmarians Cricket Club an hmachhawn leh dawn a, Champion lai Chanmarians laka phuba lakna hun tha an nei dawn a ni.

Chanmarians hneh lo hlim 3C lamin an vaw hmasa a, over 20-ah run 124 an siam. 3C batsman-te an che tha rual angreng a, Ahay Jaishi(30) leh Saidul Farukh(28)-te pahnihin ball 55-ah run 58 an vawchhuak a, Raj Kumar(15) leh Lalruatdika(13)-te'n an thlawp tha bawk nen Kulikawn bowler-te zingah wicket khat aia tam la thei an awm lo.

Kulikawn vuak hun a thleng a, Armed Veng laka run 85 ngawt vawchhuaktu Michael Lalremkima'n ball 39-ah run 50 a rawn vawchhuak leh a, Kulikawn tan bul a rawn tha hle. Michael-a partner C.Lalrinsanga'n beisei a pha lo a, ball 31 zet hmachhawn mahserun 16 bak a siam thei lo. Batsman pahnih out hnuah Kulikawn buaina a intan a, an middle order batsman zingah run 10 em pawh siam tling thei an awm loh avangin Kulikawn hian over 20-ah 108 bak an siam tling thei lo.

Kulikawn batsman-te'n 3C bowler Lalruatdika an ngam lo takzet a, Over 4 a vawmah run 18 pein wicket 6 tehmeuh a la a ni. Kulikawn batsman pawimawh Miachael-a wicket latu Ruatdika hi Man of the Match atana thlan a ni a, MCL khelh meka innings khata wicket la hnem ber a ni.

Image: Angtea Fanai