Mahuma Memorial Cricket Tournament 2017 chuan a hmawr an bawk hnai ta a, Chanmarian-in final an lut tawh hnuah Chhinga Veng CC-in final an lut ve ta bawk.

Chhinga Veng CC hian sem-final hnuhnung zawkah League Match-a an hnehloh Kulikawn CC lakah phuba la in hun pawimawh ah hnehna an chang.

Toss-a vannei zawk Chhinga Veng lamin vuak hmasak an thlang a, chetsual nawn an tum lo. Top order batsmen-te'n an tih tur an ti a Ricky (20) leh Abhay (23)-te'n wicket an hold a, chumi hnuah Inter State player Ranji pawh lo khel tawh Samik Das-a'n a thiam thil a lantir a, Kulikawn bowler-te a duh duhnaah a vuak kualsak a ni ber.

Samik Das hian Ball 93-ah Run 86 a vawchhuak a, duhthusamin a hmawr bawk lo mahse Chhinga Veng hian Over 40-ah wicket kua hlohin run 207 an tlin tho a, Kulikawn bowler ah Rosiamliana leh Parvez-te'n wicket thum ve ve an la bawk.

Kulikawn lamin final lut turin Ball 240-ah Run 208 siam an ngai a, League Match-a khel tha captain Michael Lalremkima Run 2 chiah a siamin a out a, Vikash a rawn Duck out bawk nen Kulikawn tan a harsa chho hle.

Chhinga Veng an phur tulh tulh thung a, Bowling lama wicket thum la thei Parvez-a'n theihtawp chhuahin Run 54 a rawn vawchhuak a, Lalbiaktluanga'n Run 24 a rawn thawh ve bawk naa Chhinga Veng bowler Lalhruaimawia Ralte an ngam ta lo.

Hruaimawia hian Over 8 vawmin wicket nga lawih a la a, Run 35 a pe. Hruaimawia chetthat niah hian Kulikawn hi Over 40-ah Run 160 siamin Wicket 9 an hloh a an Target hi Run 47-in an pha ta lo a ni.

MATCH SUMMARY

Toss: Chhinga Veng CC elected to Bat

Chhinga Veng: 207/9 (40)

Kulikawn CC: 160/9 (40)

Chhinga Veng CC won by 47 runs

M.O.M: Lalhruaimawia Ralte

FINAL

20.12.2017 (9:30am)

Chhinga Veng CC vs Chanmarians