Nghahhlelh a hlawh a, Conor McGregor leh Khabib Nurmagomedov te inbeih hun a hnai ta hle a. Nilaithawhtan khan a vawi khatna atan an indinchilh ta a, hetah hian Conor chuan chungnun zawkna a nei.

New York City a Radio City Music Hall-ah anni pahnih hi an inhmachhawn a, eng eng emaw an sawi ve ve a, Conor hi Khabib ai chuan thil pakhatah a chungnung zawk hle a, chanchinthar lakhawmtute an hmachhawn tumin tawng theih lamah Khabib hian a tluk lo hle a. Las Vegas khawpuia T-Mobile Arena-a UFC 229-a an inbeih huna chungnung tur hriat a chakawm tawh hle a ni.

Conor McGregor chuan, “Duhtawka sawisak ka chak zek zek tawh a, ka hmaa a la din loh avang hian tu mah a la bei tak tak lo tihna a ni a. Ropui viauah a inngai ve ngawt a, ka thiat darh ang a, a nasa thei ang berin ka sawp dawn a ni,” a ti.

Khabib Nurmagomedov chuan, “A duh duh lo sawi ve vel mai mai rawh se. A tawng vak vak ang a, hetiang hi a ni dawn tih pawh ka hre lawk sa a, mahse October ni 6 hi a pawimawh ber a, Octagon chhungah kan lut ang a, a kawngka an kalh hunah engkim a chiang mai ang. Ka sawisa rethei dawn lutuk,” a ti bawk.

UFC president Dana White kaihhruaina hnuaia an inhmachhawn tum hian Irish fighter chuan a thiam thil a tilang leh a, a tawng hnem leh hle mai a. Nurmagomedov a tawng ve dawn apiang deuh thawin McGregor chuan a lo tawng khalh zel a, a thil sawi zawh hun a nghah a thil sawi ve a tum pawhin Conor hian a chhilh zel a ni.

“Ka inpeih tawh khawp mai a, ka chungnung dawn hle a, canvas-ah a lu a sawt dawn tih ka hmu lawk a, canvas pawh a thisenin a bual ang a. Round 5 inbei thei turin ka inbuatsaih thlap a ni,” tiin Conor McGregor chuan a sawi.

Dana White chuan, “Conor chu a rawn inlan a, a thil tih thin a rawn ti leh chat a, a tawng nasa leh hle a. Hetianga rilru indonaah hian chuan a chungnung khawp mai a, amah tluk thei tur hi an la awm lo niin ka hria,” a ti.

McGregor hian UFC khawvelah boruak a nei lian tan leh tawh a, vawi 6 fight nei turin contract a ziak thar niin Dana White chuan a sawi a. Eng angin nge inremna an ziah tih chu an la puangzar rih lo a, mahse Dana hian Conor chu UFC-ah chuan pawisa hui lut hnem pawl a nih tur thu a sawi.