Kenya athletes-te chu Rio Olympic a tel thei lo tura hrem theih reng an ni. Kenya athletes-te zingah damdawi hman phal loh hmang an thahnem hle a, World Anti-Doping Agency(WADA) chuan Ahletics Kenya hruaitute chu hemi kawngah hian hma chak zawka la turin a phut a ni.
WADA hian Ahletics Kenya hruaiatute chu damdawi hman phal loh hman chungchanga hma chak zawka an la lo a nih chuan Kenyan athletes-te Rio Olympics a tel phalsak an nih loh tur thu a hrilh a ni.
Athletics Kenya hruaitute hi WADA chuan May 2 thleng hun a pe a ni. Kenya mai bakah Ethiopia pawh WADA hian an infiammite'n damdawi hman phal loh an hmang nge hmang lo enchhin turin thu a pe bawk. Ethiopia erawh November thla thleng hun pek an ni.
Kenya leh Ethiopia hi track and field lamah chuan khawvel awptu an ni tih theih a ni a. Kenya hi 2015 World Athletics Championship-ah khan pakhatna an ni a, Ethiopia hi pangana an ni bawk.
Hetiang hi nimahse ram pahnih infiammite drug test paltlang zo lo an thahnem hle a. Kum 2011 hnulam khan Kenyan athletes 40 zet chuan drug test an paltlang zo lo tawh a ni.
Kenya athletics team Doctor Ayalew Tilahun chuan, " An mi ngenna anga hma kan la lo a nih chuan IAAF atanga hrem kan nih tur thu an sawi a ni." tiin Kenya infiammite chu hrem theih an nih thu a sawi. Hetihlai mek hian Athletics Kenya President ni lailawk mek Jackson Tuwei chuan WADA chu an hnathawh chhoh danah an lawm thu a sawi thung.